Бақыт қайда барасың?

– Бақыт қайда барасың?

– Ата-анасын сыйлаған,
Ұйымшылдық ойлаған,
Тату жанға барамын.

– Бақыт қайда барасың?
– Өсірген жақсы баласын,
Сыйлаған ата-анасын,
Көргенді ұлға барамын.

– Бақыт қайда барасың?
– Балбұл жанған көрікті,
Ұл мен қызы серікті,
Берекелі үйге барамын.

– Бақыт қайда барасың?
– Еш адамды күндемес,
Өсек отын үрлемес,
Әдепті үйге барамын.

– Бақыт қайда барасың?
– Ұлы, қызы есейген,
Ауыз бірлік күшейген,
Келінді үйге барамын.

– Бақыт қайда барасың?
– Шариғат сөзін тыңдаған,
0 дүниені ойлаған,
Аллалы үйге барамын.

– Бақыт қайда барасың?
– Сыйлай білген молланы,
Діннің жолы қорғаны,
Бісмілләлі үйге барамын.

– Бақыт қайда барасың?
– Үйінде тұрған Құраны,
Расул Аллаһ ұраны,
Тәртіпті үйге барамын.

– Бақыт қайда барасың?
– Көршімен болған бірлігі,
Тағат, ғибадат тірлігі,
Ұйымшыл елге барамын.

– Бақыт қайда барасың?
– Тарауық намаз оқыған,
Көңіліне аят тоқыған,
Ниетті елге барамын.

– Бақыт қайда барасың?
– Сәресі, сахар ішетін,
Хақ жолына түсетін,
Сәресі ішуге барамын.

– Бақыт қайда барасың?
– Балбыраған бесікте,
Қайыры бар есікте,
Балалы үйге барамын.

– Бақыт қайда барасың?
– Келін мен қызы ибалы,
Ата-анасын сыйлайтын,
Сондай үйге барамын.

– Бақыт қайда барасың?
– Туысымен татулы,
Жаман сөз жоқ шатулы
Ынтымақты үйге барамын.

– Бақыт қайда барасың?
– Соғысқа құмар ойы жоқ,
Ұлан асыр тойы көп,
Бейбіт елге барамын!

©Қабан (Қаблиса) жырау Асанұлы

 

Пікір үстеу

Э-пошта мекенжайыңыз жарияланбайды. Міндетті өрістер * таңбаланған