18 жасар ел чемпионы
Батысқазақстандық жас спортшы Даниял Сәбитов 18 жасында Қазақстан чемпионы атағын иеленіп, Жайық жұртшылығын бір қуантты.
Сәл кейінге шегініс жасасақ, жерлесіміз Даниял Сәбитов осы жылдың қараша айының соңында Шымкент қаласында өткен бокстан ересектер арасындағы Қазақстан чемпионатында 49 келі салмақта Азия чемпионы, 32 жасар ақмолалық боксшы Теміртас Жүсіповпен белдесіп, қарсыласын жеңген еді. Нәтижесінде жас спортшы Д.Сәбит Қазақстан чемпионы атанды.
Даниялдың мұндай биік белесті бағындыруына бапкерінің де сіңірген еңбегі зор екені сөзсіз. Оны спортқа баулып жүрген БҚО-ның ересектер арасындағы аға жаттықтырушысы Саттар Сұлтанғалиев шәкірті үшін биылғы жыл сәтті аяқталғанын қуана жеткізді. Себебі биыл жастар арасындағы жарыста 3-орын алып, қола медальды қанжығалаған Даниял 18 жасқа толысымен бокстан ересектер арасындағы ел чемпионатында бағын сынаған. Сөйтіп Қазақстан чемпионы атанып, спорттағы жұлдызы биіктей түсіпті.
– Даниял кәсіби спортқа екі жыл бұрын 2018 жылы 16 жасында келді. Төрт айдан кейін жастар арасындағы Қазақстан чемпионатында 1-орын алып, алғашқы жүлдесін қоржынға салды. Содан кейін жастар құрама командасына алынып, әр түрлі жаттығулардан өтті. Ал 2019 жылы Сербияның Белград қаласында өткен спорт додасында 3-орын иеленді, – деген Саттар Аманқосұлы шәкіртінің аз уақыт ішінде жеткен жетістіктерінен хабардар етті.
Ал Даниял жарысқа аттанарда алдына «жеңуім керек» деген мақсат қойғанымен, чемпион боламын деп ойламағанын жасырмады. – Жеңіске жеткеніме қуаныштымын. Алдағы уақытта спорттағы чемпион ағаларымның жеңісті жолын жалғау үшін еңбектенемін. Енді ересектер арасындағы Әлем біріншілігінде өз бағымды сынап көрмекпін, – дейді қазақтың қайсар ұлы. Жерлесіміз соңғы жарыстан кейін бокстан ҚР Ұлттық құрама командасының қатарына қабылданған екен.
Даниял секілді спортқа құштар батысқазақстандық жеткіншектердің түрлі деңгейдегі додаларда биіктен көрінуіне қолдау көрсетіп жүрген азаматтар аз емес. Солардың қатарында БҚО дене шынықтыру және спорт басқармасының басшысы Қаймен Есендияров, облыстық жоғары спорт шеберлігі мектебінің директоры Асхат Шайхиев, БҚО бокс федерациясының президенті Алпамыс Камалов, БҚО дзюдо федерациясының президенті Рустам Шайхиевтерді атап өтуге болады.
Ләззат ҚАЖЫМОВА
Батыс Қазақстан облысы