Үкімет басшысы «Шыңғысхан мүсіні» туристік кешенін аралады

Ескерткіштің жоғарғы бөлігінде 30 метрлік биіктікте айналаны барынша шолуға мүмкіндік беретін үлкен алаңқай бар.

К.Мәсімов кешен ішіндегі мұражайды аралады.

Ондағы негізгі экспонаттардың бірі – символикалық алтын қамшы болып табылады. Аңызға сүйенсек, Темуджин (болашақ Шыңғысхан) мүсіні орналасқан нақ осы жерде табыстылықтың белгісі болып саналатын қамшы тауып алған. Бұдан соң оған моңғолдарды бір халық ретінде жұмылдыру мүмкін болған деп саналады.

Айта кетейік, Қазақстан мен Моңғолия мәдени және тарихи зерттеулер саласында екіжақты қарым-қатынасты белсенді түрде дамытуда.

Мәселен, «Мәдени мұра» мемлекеттік бағдарламасы аясында түркі халықтарының ескерткіштерін зерттеу мақсатында 2005 жылы түркітанушы ғалымдар тобы Моңғолияға ғылыми экспедиция ұйымдастырған. Зерттеу нәтижелері бойынша 9 ежелгі түркі ескерткіші мен сақ тайпаларына, түркілерге тиесілі болған 115 жазбаны қамтыған тізім жасалды. Осы экспедиция негізінде «Орхон ескерткіштерінің үлкен атласы» жарыққа шықты.

2008-2009 жылдары «Қазреставрация» түркі руна жазбалары бар бірнеше ескерткіштің көшірмелерін жасады. 2010 жылы бұл көшірмелер Л.Н.Гумилев атындағы Еуразия ұлттық университетінің «Күлтегін» атриумына қойылды.

2011 жылы Л.Н.Гумилев атындағы Еуразия ұлттық университеті мен Моңғолия Ғылым академиясының Тарих және археология институты Майқанұл кесенесінде қазба жұмыстарын жүргізді. Нәтижесінде 461 тарихи-мәдени ескерткіш табылды. Қазір экспонаттар Моңғолиядағы Қарақорым өлкетану мұражайына қойылған.

Бірлескен спорттық шаралар да жиі ұйымдастырылады. Биылғы жылдың алғашқы жартыжылдығының өзінде-ақ Астана, Алматы және Ұлан-Батыр қалаларында ерлер мен әйелдер арасында күрес пен бокстан 8 жарыс өткізілген.

Еске салайық, К.Мәсімов Моңғолияға XI АСЕМ саммитіне қатысу үшін барды, шара 15 шілде күні Ұлан-Батыр қаласында өтеді.