Аграрлы аудандардың айтулы тірліктері

Газетіміздің дәстүрлі экспедициясы Жамбыл облысының Қордай және Меркі аудандарында да жалғасты.

Қордай: Үкіметтің 20 жобасы мәдениетімізге қан жүгіртті

Әулиеата аймағының ауылшаруашылығының драйвері іспетті қос аудан шаруаларының тірлігі қашанда қарбалас. Малға жайлы, егінге қолайлы Қордай жерінде болған сапарымызда «Ауыл – Ел бесігі» бағдарламасының іске асырылу барысына баса назар аудардық. Жұртшылықпен кездестік, әкімдерімен де амандық-саулық сұрастық.
Жалпы «Ауыл – Ел бесігі» жобасы ауыл-аймақтың ажарын кіргізіп, тіршілігіне қан жүгіртіп, болашағына үміт сыйлап отырған берекелі жоба болды. Өйткені осы игіліктің арқасында қаншама елді мекеннің есігіне қара құлып ілінген мәдениет үйіне жан бітіріп, тозып кеткен мектебі мен ауруханасын қайта тұрғызып берді. Ауызсуын алыстан тасып ішіп отырғандар тіршілік нәріне қол жеткізсе, өмірі асфальт көрмеген ойдым-ойдым жолдары бүгінде тақтайдай теп-тегіс. Не керек, «Ауыл – Ел бесігінің» арқасында алтын бесік – ауылымыз қайта түлеп жатыр.

 

Қордай ауданы облыстағы әлеуметтік-экономикалық жағдайы тұрақты, бизнес және агро секторы дамыған өлке. Кәсіпкерлігінің де өрісі кең. Сондықтан мұнда алып бара жатқан әлеуметтік күрделі мәселе жоқ. Дегенмен, мәңгілік ешнәрсе жоқ. Құлағалы тұрмаса да күрделі жөндеуді керек ететін көнерген әлеуметтік нысандар баршылық. Мәдениет үйлері де көп ауылда жұмысын тоқтатқалы қашан. Сол себепті биылға Қордай ауданы бойынша «Ауыл – Ел бесігі» жобасы аясында Үкімет 20 жобаға 3063,7 млн теңге қаражат бөлген екен. Тізімге көз жүгіртсек, қаржының көп бөлігі мәдениет үйлерінің құрылысына бағытталған сияқты.
Аталған 20 жобаның 14-іне биыл 1862,8 млн теңге қаражат бөлініп, есепті кезеңде оның 60,5 пайызы, яғни 1127,3 млн теңгесі игерілген.
Жекелеп айтсақ, спорт саласында 3 жобаға 659,3 млн теңге қаражат қарастырылып, бүгінгі күнге игерілген қаражат 489,6 млн теңге немесе 74 пайызды құрап отыр.

 

Алдымен Қарасу ауылындағы дене шынықтыру-сауықтыру кешенінің құрылысына тоқталсақ. Бөлінген қаражат – 356,7 млн теңге. Құрылыс келесі жылы толық аяқталатын болғандықтан, қарастырылған қаражаттың биылға 171 млн теңгесі ғана бөлініп, игерілген. Келер жылға қалғаны – 166,9 млн теңге. Оның ішінде республикалық бюджеттен 133,1 млн, аудандық бюджеттен 33,8 млн теңге. Игерілген қаражат – 130,6 млн теңге немесе 88 пайызды құрайды.
Карасай ауылында да дене шынықтыру-сауықтыру кешені бой көтерген. Құрылысқа бөлінген қаражат – 326,1 млн теңге. Бұл өтпелі жобаның былтыр 143,5 млн, биыл 166,9 млн теңге қаражаты, яғни 90 пайызы игеріліпті.
Ауқатты ауылына да керек нысанның бірі дене шынықтыру-сауықтыру кешені еді. «Ауыл – Ел бесігі» жобасы бұл олқылықтың орнын толтырып отыр. Республикалық бюджеттен 310,3 млн, аудандық бюджеттен 34,4 млн теңге бөлініп, оның 208,7 млн теңгесі игеріліп, нысан пайдалануға берілудің алдында тұр.
Мәдениет саласы бойынша Қордай ауданында 6 жоба қолға алынған. Жалпы бөлінген қаражат – 867,6 млн теңге. Бүгінгі күнге игерілген қаражат 300,7 млн теңге немесе 39 пайызды құрайды.

 

Сондай-ақ Еңбек ауылындағы мәдениет үйін күрделі жөндеуіне 73,2 млн теңге қаражат бөлініп, ол қаржы толығымен игеріліп, құрылыс жұмыстары да толығымен аяқталған.
Сұлутөр ауылындағы мәдениет үйі де ескіліктің қалдығындай еді. Атқарушы билік оны күрделі жөндеуден өткізу керек деп шешіп, бюджеттен 82 млн теңге қаржы бөлген. Оның 77,3 млн теңгесі республикалық бюджеттен алынса, қалғаны аудандық бюджеттен бөлініп отыр. Бүгінде бөлінген қаражат толығымен игеріліп, жұмыс 100 пайызға аяқталыпты.
Қордай ауылындағы аудандық Мәдениет үйі де биыл күрделі жөндеу жұмыстарына байланысты жұмысын тоқтатты. Ондағы жұмыстарға 100,1 млн теңге бөлініпті. Әзірге жұмыс толық аяқталмаған, қаражаттың 27,3 млн теңгесі (27 пайыз) ғана игеріліп тұр.
Сол сияқты, Қарасу ауылындағы 90 орындық мәдениет үйін салуға 161,5 млн теңге, Қақпатас ауылында мәдениет үйін салуға 350 млн теңге, Бетқайнар ауылында мәдениет үйін салуға 349,7 млн теңге бөлінген. Бұл аталған нысандардың құрылысы әлі толық аяқталмаған.
Жолдарды орташа жөндеу бойынша 5 жобаға бөлінген қаражат 337 млн теңгені құраған. Қаражат 100 пайыз игерілген. Атап айтсақ, Кенен ауылындағы Жылыбаев және Қашағанов көшелерінің орташа жөндеуіне 53,2 млн теңге қаражат бөлінген.
Кенен ауылындағы Қордай және Еспаев көшелерінің орташа жөндеуіне бөлінген қаражат – 52,5 млн теңге. Осы ауылдағы Несіпбаев көшесінің орташа жөндеуіне де 51,8 млн теңге бөлініп отыр.

 

Отар ауылының көшелері де орташа жөндеуден өтіп жатыр. Оған бөлінген қаражат – 99,2 млн теңге.
Жаңатұрмыс ауылы тұрғындары да көшелердің жөнделгеніне қуанып жүр. Ауылдағы Жамбыл, Қалманбет, Алмабек көшелерінің орташа жөндеуіне бөлінген қаражат аз емес – 80,1 млн теңге. Бүгінгі күнге жол жөндеу жұмыстары толығымен аяқталған.
Денсаулық сақтау саласы бойынша да қыруар қаржы бөлінген. 3 жобаның жобалық-сметалық құны 288,7 млн теңгені құрады.
Сұлутөр ауылында ауысымына 10 келушіге арналған фельдшерлік-акушерлік пункттің құрылысына 82 млн теңге бөлініп, жұмыс аяқталып, нысан ел игілігіне беріліп қойды.
Беріктас ауылында да биыл денсаулық сақтау саласында үлкен қуаныш. Ауысымына 10 келушіге арналған фельдшерлік-акушерлік пункттің құрылысына 75,2 млн теңге бөлініп, қаражат толық игерілді.
Отар ауылындағы дәрігерлік амбулатория ғимаратына күрделі жөндеу жүргізу бөлінген қаражат 131,4 млн теңге бөлініп, бүгінгі күнге жұмыстар толығымен аяқталды.

 

Білім беру саласы бойынша да 3 жобаға жүзеге асуда. Бұл бағытқа 912,2 млн теңге қаражат бөлініпті. Бөлінген қаржы толығымен игеріліп, жұмыс та аяқталған. Атап айтсақ, Қордай ауылындағы №1 мектеп-гимназиясына күрделі жөндеу жұмыстары жүргізілген, Отар ауылында К.Әзірбаев атындағы №41 орта мектеп абаттандырылып, күрделі жөндеуден өтсе, Степное ауылындағы №24 орта мектепке күрделі жөндеу жұмыстары жүргізіліп, ауласы абаттандырылған.
Экспедиция аясында күрделі жөндеу жұмыстары жүріп жатқан аудандық Мәдениет үйіне бас сұғып, Степное ауылындағы М.Әуезов атындағы №24 орта мектебіне де кірдік. Бұл білім ордасы биыл «Ауыл – Ел бесігі» жобасы аясында күрделі жөндеуден өткен.
Ауылдық округ әкімі Қайрат Жолдасбаев округтің жалпы жағдайымен таныстырып шықса, мектеп директоры Дарын Биғазиев оқушылардың оқу үлгерімі мен ұстаздар қауымының жағдайын қысқаша баяндап өтті.
Ал мұғалімдермен болған кездесуде Сәуле Мешітбайқызы ұстаз мәртебесінің, үйдегі және мектептегі бала тәрбиесінің қандай болу керектігі төңірегінде біраз тұшымды дүниелерімен бөлісті. Әсіресе, оқушыны кітап-журнал оқуға баулу мәселесінің өзекті болып отырғанын ұстаздар да құптады. Ұлағатты ұстаз болған, бүгінде журналистиканың бел ортасында жүрген С.Мешітбайқызы газетке не үшін жазылу керектігін әдемілеп тұрып жеткізіп берді. Осы орайда ауылдық округ әкімінің орынбасары Іңкәр Шүйшібекова осындай кездесулер жиі болып тұрса деген тілегін жеткізді. Өйткені газетке жазылыңдар деп құр сөзбен үгіттей бергеннен гөрі осындай жүзбе-жүз кездесулердің маңызы анағұрлым артығырақ екенін айтып өтті.

 

Меркі: Алты айда атқарылған жұмыстар қомақты

 

Қордайдан шығып, Меркі ауданына бет бұрдық. Мұнда да «Ауыл – Ел бесігі» жобасы бойынша тыңғылықты тірлік атқарылуда. Алдымен Ақарал ауылындағы №5 орта мектептің жағдайымен таныстық. Мұнда аталған жоба аясында күрделі жөндеу жұмыстары қолға алынған.
Жөндеу жұмыстары шамамен 80 пайызға аяқталып қалыпты. Дегенмен кестеден кешігуде. Оны құрылысшы мамандар ауа райының күрт суытып кеткенімен түсіндірді. Бірақ мердігер «ТаразЭлитСтрой» ЖШС нысанды биыл бітіруге тырысып, бар күшімен жұмысқа кіріскен.
Ойтал ауылында 180 орындық мәдениет үйі бой көтеріп келеді. Бұрын мұнда мұндай мәдени ошақ болмаған екен. Нысан құрылысына 168 млн теңге бөлінген. Нысан келесі жылға өтпелі болғандықтан, қаржы толық бөлінбеген екен. Бірақ мердігерлер өз қаражатына осы айдың соңына қарай аяқтап береміз деп отыр.
Меркі ауылындағы 145 орындық «Балауса» балабақшасы да тотыдай-ақ түрленіп келеді. 1965 жылы салынған мектепке дейінгі бұл білім беру нысанының ғимараты ескірген екен. Сондықтан биыл оған «Ауыл – Ел бесігі» жобасымен күрделі жөндеу жұмысы жүргізіліп жатыр екен. Биыл маусым айында басталған құрылыс, бұйыртса, осы айда аяқталады деп күтілуде.

 

Экспедиция аясында аудан Жорабек Баубековпен де жолықтық. Осы қызметке келгеніне алты айға жуық болған Жорабек Нұрмергенұлы атқарылған жұмыс пен алдағы жоспарларын кеңірек айтып берді. Ол қызметіне тағайындалғаннан кейін аудан аумағында ауқымды жұмыстар қолға алынып, межелі жоспарлар бекітілгенін және сол жоспар бойынша орындалуы көзделген жұмыстар кезең-кезеңімен жүзеге асып жатқанын жеткізді.
– Аудан әкімі жұмысын ең алдымен ауданның жалпы ахуалын зерделеуден бастадым. Аудандағы 45 елді мекеннің барлығын аралап шығып, оның ішінде барлық әлеуметтік, кәсіпкерлік, қызмет көрсететін нысандардың жұмысымен таныстым. Сондай-ақ 14 ауылдық округте 34 қоғамдық қабылдау өткізіп, ауылдардағы мәселелерді тұрғындардың өздерімен бірге талқыладым. Сондай-ақ тұрғындардың өтініш-тілектері және ұсыныстары негізінде аудандағы барлық мәселені жинақтап, ауданның даму жоспарына енгіздік. Мәселелерді кезең-кезеңімен шешу мақсатында басымдықтар анықталып, сол бойынша жүйелі әрі нақты жұмыс жасалып келеді, – деді Ж.Баубеков.

 

Қазіргі уақытта аудан аумағында 16 жоба аясында 48 ауылішілік көше жолдары жаңарған. Ақкөз Қайнар, Беларық ауылдары тұрғындарының көп жылдан бергі сұранысы орындалып, аталған ауылдарға газ құбыры тартылып, қазіргі уақытта іске қосу жұмыстары жүргізілуде. Сондай-ақ Қарасу ауылында да газ құбырларын тарту жұмыстары басталып, жоба өтпелі болғандықтан, келесі жылы жалғасын табатын көрінеді.
– Аудандағы ең ірі аймақтардың бірі Ойтал ауылдық округі тұрғындарының мәдениет үйі қажеттігі жөніндегі сұраныстары орындалды. Биыл 180 орындық мәдениет үйінің құрылысы басталды. Дәл сол сияқты Мыңқазан ауылында да 90 орындық ауылдық клубтың құрылысы қызу жүргізілуде.
Мемлекет басшысының биылғы жылды «Балалар жылы» деп жариялауына орай, Меркі, Ақарал және Сыпатай батыр ауылдарында балалар алаңшасы салынып, тұрғындардың игілігіне берілді.
Білім ошақтары бойынша Меркі ауылында Балауса бөбекжай бақшасында және Ақарал ауылындағы №5 мектеп-гимназиясының ғимараттары күрделі жөндеуден өтуде.
Облыс әкімінің тапсырмасына сәйкес, «Асарлатып үй салу» жобасы аясында 6 үй, 3 асхана құрылысы жоспарланып, қазіргі уақытта 5 үй мен 2 асхана тұрғындар игілігіне берілді (Кеңес, Аспара, Ойтал, Ақарал, Жамбыл және Тәтті мен Жаңатоған ауылдары). Жоспарланған қалған нысандар жуық арада өз иелеріне табысталатын болады.
Аудандағы су тапшылығы мәселесін шешу мақсатында 46 ұңғыманы қазу жұмыстары жүргізілуде. Ұңғыма құрылыстары толығымен аяқталған соң, 2200 га жерді суармалы сумен қамтуға мүмкіндік туады. Сонымен қатар Андас батыр және Жаңатоған ауылдық округтерінде Андас І, Андас ІІ және Андас ІІІ су қоймаларын салу жұмыстары қолға алынды. Су қоймаларының құрылысы аяқталған соң, тағы 700 га жерді суармалы сумен қамтуға болады.
Денсаулық саласында Тәтті ауылдық округінде 30 келушіге арналған дәрігерлік амбулатория мен Гранитогор ауылында 10 келушіге арналған фельдшерлік-акушерлік пунктінің құрылысы аяқталып, Республика күні мерекесіне орай, ел игілігіне пайдалануға берілді, – деген Жорабек Нұрмергенұлы тұрғын үй құрылысы, ауылшаруашылығы, кәсіпкерлік саласы бойынша да ақпарат беріп өтті.
– Аудан халқын тұрғын үйге арналған жер учаскелерімен қамтамасыз ету мақсатында Мыңқазан, Аққайнар, Меркі, Тұрлыбай батыр, Т.Рысқұлов Сұрат ауылдарынан арнайы алқаптар қарастырылып, қазіргі уақытта инженерлік-инфрақұрылымдық жұмыстары жүргізілуде.
Ауылшаруашылығы саласында 2022 жылы 23739,6 гектар бидай, 27417 гектар арпа, барлығы 51156,6 гектар дәнді масақты дақылдар орақтан өткізілді. Сонымен қатар 1055,4 гектар кортоп, 2370 гектар көкөніс, 7540,8 гектар мақсары, 450 гектар бақша дақылдары жиналып, 691,5 гектар жүгері жиналды.
Ағымдағы жылы 1354 гектар алқаптан 41822 тонна тәтті түбір жиналып, бұл облыс бойынша өткізілген 107500 тоннаның 38,9 пайызын құрады. Биылғы жылы өңдеу кәсіпорнына өткізілген қант қызылшасының 1 тоннасына қант зауыты 15000 теңге төлейтін болса, Үкімет тарапынан 1 тоннасына 15000 теңге субсидия төленеді. Осы орайда, аудандық қант қызылшасын өндірушілерге 582 млн 98 мың теңге субсидия төленді.
Кәсіпкерлік бағытында «Бизнестің жол картасы – 2025» бағдарламасы аясында 328,9 млн теңгені құрайтын 49 жобаға қолдау көрсетілді. Оның ішінде «Гүлдер» шаруа қожалығының жеміс-жидек сақтау және «Green garden» шаруа қожалығы алма бағының инфрақұрылымдық жұмыстарын атап өтсек болады, – деді аудан басшысы.
Байқағанымыз ауданның негізгі капиталына салынған инвестиция көлемі де аз емес көрінді – 13196,8 теңгені құрапты.
Осы орайда, жұмыспен қамту шаралары бойынша, кәсіпкерлікті дамыту жөніндегі ұлттық бағдарлама аясында 5957 адам жұмыспен қамтудың белсенді шараларына тартылса, жаппай кәсіпкерлікті дамыту бойынша 253 азаматқа қаражат берілген. Қысқа мерзімді оқуға 138 азамат жіберілсе, әлеуметтік жұмыс орындарын құру бойынша 100 адам жұмысқа жолданыпты. Жастар тәжірибесі бойынша 131 адам, алғашқы жұмыс орны бойынша 10 адам жұмысқа жолданған. Ал бос жұмыс орындары бойынша 2580 адам жұмысқа орналасты.
– Ауыл халқының тұрмысын түзеу мақсатында облыс бойынша жүзеге асып жатқан пилоттық жобаға Ақермен ауылы енгізілді. Қазіргі таңдағы округтегі 441 ауланың 145-і жобаға қатысуға ниет білдіріп, жалпы жоба құны 587 032,85 мың теңгені құрап отыр.
Жалпы ауданның әлеуметтік-экономикалық даму бағытындағы жоспарлы әрі жүйелі жұмыстары өз жалғасын табатын болады, – деді Жорабек Баубеков.

 

Ел десе елжіреген  жүрегі…

 

Кезінде желмая мініп, жерұйықты іздеген Асан қайғының Алаш даласын шарлап өтіп, әр аймақтың өзіне ғана тән ерекше қасиеттерін атап өткені белгілі. Иә, Асан қайғы бабамыз қанаушысы мен азап тартушысы жоқ, әділетті де ашық қоғам мен өзінің жанына жағымды жер жәннатын ғана іздегені мәлім.
Ал қазіргі кезеңдегі алмағайып заманда көпшіліктің мүддесі үшін зар еңіреп, ұлтының ұлылығын барынша қалпына келтіруге ыңғай танытып, қазақтың сар даласын сағы сынбай аралап жүрген арда азаматымыз – Сәуле Мешітбайқызы жұмысының жөні де жосығы да сол Асан қайғы атамыздың арғы-бергі арманының жалғасы іспетті көрінеді маған…

 

Иә, сәрсенбінің сәтті күні Сәуле Мешітбайқызы өзінің алғашқы еңбек жолын бастаған өлкесі – Меркі жеріне аяқ басып, қазағы үшін қарекет еткен нар тұлға Асанбай Асқаровтың есімін иеленген №1 мектепте болып, жадыда жатталып қалар кездесуін өткізген-ді.
Біздің ендігі мақсатымыз – халықаралық «Qasaqstan dauiri» ЖШС бас директоры, «Ел Ана» қоғамдық қорының президенті, «Ел Ана» қоғамдық-танымдық, әлеуметтік-ақпараттық сайтының Бас редакторы, ҚР Журналистер Одағының мүшесі, ҚР Еңбек сіңірген қайраткері, Жамбыл облысының Құрметті азаматы, тіл жанашыры, «Ел анасы» аталып кеткен Сәуле Мешітбайқызының М.Әуезов атындағы №9 мектеп-лицейіне сол күні жасаған сапарын көпшілікке насихаттау.
Сонымен, мектеп ауласында С.Мешітбайқызын аудан әкімінің орынбасары Нұрсұлтан Нәрікбаев, мектеп директоры Болатбек Қыстауов, директордың тәрбие ісі жөніндегі орынбасары Назгүл Анисова мен жоғары сынып оқушылары қарсы алды.

 

Мектеп қақпасы жанындағы тарихи нысан – кезінде Тұрар Рысқұлов сынды ел азаматтары дәріс алған білім ордасы, қазіргі Т.Рысқұлов музейін көріп, таныспақ болған Сәуле Мешітбайқызы:
– Тұрар Рысқұлов – барша қазақтың базынасын өктем билікке қаймықпай жеткізген нар тұлға. Сол есіл ердің білім алып, ол білімін ұлтының қамы үшін жұмсаған мектепті сырт айналып өту күпірлік болар, – деген соң, көпшілік аталған нысанға бет алды.
– Айналайын, әруағыңнан асыл Аға! Ұрпағың өзіңді тәу етіп келіп тұр! – деп, күбірлей есік аттаған Сәуле Мешітбайқызы:
– Негізі, ұлы Абайды Мұхтар Әуезов көпке танытса, Тұрар ағамызды «журналистің арқалағаны – алтын, жегені – жантақ» деген тәмсілімен шығармашыл адамдарға араша түскен Шер-ағам (Ш.Мұртаза) көкке көтерді, – деп атап өтті.

 

Музей ішіндегі жәдігерлермен мектеп директорының тәрбие ісі жөніндегі орынбасары Назгүл Анисованың таныстыруымен аралап шыққан Сәуле Мешітбаева осындағы Т.Рысқұловқа, оның үзеңгілес достары, сол бір заманның атақты тұлғалары Қабылбек Сарымолдаев, Мақсұт Жылысбаев сынды ұлт арыстарына арналған арнайы бұрыштарды мектеп оқушылары – Аяжан Иса, Әсел Құдайберген, Назира Кемелбай, Қарақат Жақсылық және т.б. клуб мүшелері кеңінен таныстырып, әр тұлғаға жеке тоқталып өтті. Одан кейін жақында ғана М.Әуезовтың есімін иеленген мектеп ішін аралап көріп, оң өзгерістер үшін алғысын жеткізген С.Мешітбайқызы мектеп директоры Болатбек Қыстауовқа «Намыс қайрағы» және «Ұлт шырағы» атты жаңа кітаптарын сыйға тартып, ұлт боламын, шәкірттерім намысты болсын десеңіз, жергілікті және ұлт пен тіл мәселесіне ашық көзбен қарайтын түрлі баспасөзге жазылу міндет екенін қадап айтты.

 

Т.Рысқұлов: Жағымды жаңалықтар жетерлік

«Батыс Еуропа – Батыс Қытай» күре жолының бойында орналасқан Т.Рысқұлов ауданы да егінге қолайлы, малға жайлы мекен. Ауылшаруашылығы жақсы жолға қойылған ауданда мемлекеттің де қолдауымен жүзеге асып жатқан жобалар баршылық. Әсіресе «Ауыл – Ел бесігі» жобасының игілін рысқұловтықтар да көріп келеді. Атап айтсақ, жақында жақсылық ауылында жаңа дәрігерлік амбулатория ел игілігіне берілді.
Ауыл тұрғындарының көптен күткен қуанышын бөлісуге аудан әкімі Ернар Есіркепов, Жамбыл облысы әкімдігінің денсаулық сақтау басқармасы басшылық өкілдері, аудандық ардагерлер кеңесінің төрағасы Қожайхан Бижанов қатысып, ақ батасын берген екен.

 

Біз де осы ауылға ат басын бұрып, амбулаторияның ішін аралап көрдік. Жаңа нысанның құрылыс жұмыстарына 103 млн теңге бөлінген. 1783 ауыл тұрғыны бар Жақсылық елді мекеніндегі бұл амбулатория ауысымына 15 келушіге арналған. Заманауи дәрігерлік құрал-жабдықтармен жабдықталып, халық игілігіне беріліп отырған нысанда 11 адамды тұрақты жұмыспен қамтылып отыр. Нәтижесінде, денсаулық сақтау ұйымдарының тозуы 51 пайыздан 49 пайызға дейін төмендейді деп күтілуде.

 

Айта кететіні, биыл ауданда 2 дәрігерлік амбулаторияның құрылыс жұмыстары жүріп, жақын күндері Жаңатұрмыс ауылындағы дәрігерлік амбулатория да қолданысқа берілетін болады. Осылайша аудандағы барлық елді мекендер жергілікті дәрігерлік амбулаториялармен толығымен қамтамасыз етілмек.
Жалпы Т.Рысқұлов ауданында медицина саласы қарқынды дамып келе жатыр. Соңғы 10 жылда ауданда ана өлімі тіркелмеген. 2021 жылы аудандық орталық ауруханаға барлығы 305,1 млн теңгенің медициналық құрал-жабдықтары алынып, жарақтандыру көрсеткіші 91,2 пайызды құрап отыр.
Осылайша Жамбыл жеріндегі экспедициямыз аяқталды. Әулиеата өңіріндегі сапарымыз барысында біраз ауылды аралап, көптеген ұжымда болдық, түрлі тақырыпта ойымызды бөлісіп, екінші тараптың да пікірін тыңдадық. Ауылды аралау демекші, дәл біздің газет сияқты еліміздің әр облысына ат арылтып, елдің жағдайымен жақынырақ танысып жүрген ақпарат құралы кемде-кем, тіпті жоқтың қасы.

 

Халықаралық «Qazaqstan dauiri» газеті ауыл деп шырылдап жүргеніне биыл он бес жылға жуықтап қалды. Сондықтан біздің экспедиция мен үкіметтің «Ауыл – Ел бесігі» жобасы бір-бірімен үндес, сабақтас деп айтуға толық негіз бар. Біздің де мақсат-тілегіміз – ауылдың еңсе тіктеп, еңбегінің рәтті болуы, ас ішіп, аяқ босату емес. Сол жолда Үкімет жобасын насихаттап, елге таныстырып жүрген жайымыз бар.
Ал бірер жыл бұрын Жамбыл облысында тұсауы кесіліп, жемісті нәтижесін берген «Жамбыл облысы тұрғындарының тұрмыстық табысын арттыру» жобасы бұйыртса келер жылдан ел көлемінде көлемді бағдарлама ретінде қанат қақпақшы. Осы жобаның жай-жапсары жөнінде алдағы нөмірлерімізде толығырақ тоқталармыз.

 

 

 

Әлихан НҰРАЛИЕВ,
Жасұлан СЕЙІЛХАН,
Жамбыл облысы