АДАЛ ЕҢБЕК — ӘДІЛ БАҒАЛАНДЫ

Кеше аудан әкімдігінің мәжіліс залында биылғы жылдың қорытындысына байланысты жиын өтті. Оған аудан ардагерлері, аудан әкімдігінің бөлім басшылары, мекеме басшылары, ауыл, ауылдық округ әкімдері, аудандық мәслихаттың депутаттары қатысты. Онда алдымен аудан әкімі Бақыт Қазанбасов сөз алып, ауданымыз биылғы жылды жақсы қорытындылағалы отырғанын жеткізді.
— Биылғы жылы ауданда жоспарланған жұмыстар түгелімен атқарылды деседе болады. Былтыр 5 мектеп ашылып, 6 ауылға ауыз су берілсе, биыл 8 ауылға су тартылып жатыр. 4 ауыл көшелері асфальтталса, аудан орталығындағы Қонаев, Байзақ батыр көшелері де жаңа кейіпке енді. Төрт ауылда дәрігерлік амбулатория соғылып, оның үшеуі биыл пайдалануға беріледі. Ал Сарыкемер ауылындағы 250 орындық емхана жаңа жылдан соң халық игілігіне ұсынылады. Сондай-ақ келесі жылы Сарыкемер ауылында бірнеше қабатты 4 тұрғын үй, 1000 орындық мектеп, аурухана, Бурыл ауылында 600 орындық жаңа мектеп соғу жоспарланып отыр. Аудан экономикасының өсіп-өркендеуіне сіздердің де қосқан үлестеріңіз көп,- деді Бақыт Алпысбайұлы.
Жиында аудан басшысы Б. Қазанбасов пен аудандық мәслихаттың хатшысы Б. Ақбаев Қазақстан Республикасы Президентін сайлау науқанына дайындық және оны өткізу жұмыстарына қосқан елеулі үлестері үшін Байзақ аудандық аумақтық сайлау комиссиясының төрағасы Абдан Төлепбергенов пен Сарыкемер ауылдық округінің әкімі Сәуле Тілеуқұловаға Қазақстан Республикасы Президентінің Алғыс хатын, ал Байзақ аудандық аумақтық сайлау комиссия төрағасының орынбасары Кенесбек Мырзабеков пен аудан әкімі аппаратының ұйымдастыру инспекторлық бөлімшесінің басшысы Бауыржан Танашевқа Жамбыл облысы әкімінің Алғыс хатын табыс етті. Сондай-ақ Байзақ ауылдық клуб меңгерушісі Шырынкүл Тоқболатова, «Ынтымақ» шаруа қожалығының жетекшісі Еркін Сандыбаев, Ы. Алтынсарин атындағы орта мектебінің лаборанты Орынтай Серікова, №115, №142, №117 учаскелік сайлау комиссияларының хатшылары, мүшесі Майра Асылбекова, Қалима Оразбаева, Әлия Жақаевалар аудан әкімінің Грамотасымен, ал Қосақ, Ю. Гагарин мектептері директорының оқу ісі жөніндегі орынбасары, тарих пәні мұғалімі Айнұр Тұрапбаева мен Қарашаш Қозыбақовалар аудан әкімінің Алғыс хатымен марапатталды.
Жиында ауданымыздың өсіп-өркендеуіне айтарлықтай үлес қосқан Әмірбек Бозғұлов, Амангелді Әлімбаев, Фарида Жүнісова, Болат Ахметов, Фермебай Жуанышевтерге «Байзақ ауданының Құрметті азаматы» атағының төсбелгісі мен лентасы, куәлігі қоса тапсырылды. Марапатталғандар атынан Ә.Бозғұлов өздерінің еңбегін елеп осындай құрмет көрсетіп жатқан аудан басшылары, аудандық мәслихаттың депутаттарына алғыс айтып, алдағы уақытта да ауданның өсіп-өркендеуіне өз үлестерін қоса беретіндіктерін жеткізді.
Аудандық ардагерлер кеңесінің шешімімен кеңес төрағасының орынбасары, тұрақты комиссия төрағасы Махан Тамеев пен Серік Кембаев, Қызыл жұлдыз, Сарыкемер, Диқан, Түймекент, Мырзатай ауылдық округтері ардагерлер кеңестерінің төрағасы, мүшелері Асланбек Өмірзақов, Өмірбек Иманбеков, Абай Иманбаев, Марат Бөгенбаев, Оразбай Дәрібаевтарға «Байзақ ауданының Құрметті ардагері» атағы беріліп, төсбелгісі, куәлігі, лентасы табыс етілді. Міне осылайша еткен адал еңбек өзінің әділ бағасын алатынына тағы бір көз жеткізгендей болдық.

Сүндетулла ӘБІЛОВ,
Сарыкемер ауылы.