ДАРХАН САТЫБАЛДЫ «ҚАЗПОШТА» АҚ БАСҚАРМА ТӨРАҒАСЫМЕН КЕЗДЕСТІ
Түркістан облысының әкімі Дархан Сатыбалды «Қазпошта» АҚ Басқарма төрағасы Әсел Жанасовамен кездесті. Кездесу барысында Ұлттық пошта операторының қызметі, даму стратегиясы және басым бағыттары талқыланды. Компанияның Түркістан облысында газет-журнал жеткізу бойынша қызмет көрсету сапасын жақсарту, оның ішінде пошта байланысы операторының қызметтерін автоматтандыру жөніндегі жоспарлары айтылды. Сондай-ақ тараптар Түркістан облысындағы Ұлттық пошта операторының жобаларын цифрландыруды дамыту бағытындағы өзара ынтымақтастық туралы меморандумға қол қойды.
Компанияның даму стратегиясымен таныстырған Әсел Жанасованың айтуынша, «Қазпошта» жаңа бағытқа бет бұрып, сандық технологияларды енгізумен, онлайн-қызмет түрлерін дамытумен айналысуда. Ол қаржылық жағдайды оңалту, әлеуметтік банкті дамыту және қаржылық қызметтердің рөлін күшейту – «Қазпошта» жұмысының басым бағыттары екенін атап өтті. Сонымен бірге инфрақұрылымдар базасында мемлекеттік қызметтерді ұсыну мүмкіндігін кеңейту, электронды коммерция мен халықаралық сәлемдемелерге баса мән бере отырып, дәстүрлі пошта бизнесінің тиімділігін арттыруға күш салынған. Басқарма төрағасы аймақтардағы пошта операторы жұмысының әлеуметтік маңыздылығына, Түркістан облысының мүмкіндіктеріне тоқталды.
Өз кезегінде өңір басшысы ұлттық пошта байланысының операторының аймақтағы даму мүмкініктері мен пошта байланысы саласындағы инновациялық және цифрлық технологияларды енгізу бастамаларына қолдау болатынын атап өтті. «Қазпошта» АҚ логистика, пошта, қаржы және агенттік бағытында халыққа қызмет түрін көрсетеді. Түркістан облыстық филиалында 1173 қызметкер жұмыс атқарады. Оның ішінде 326 қызметкер – пошташы.
Сонымен қатар ауылдық елді мекендерде зейнетақылар мен жәрдемақыларды, жалақыны төлеу, төлемдерді қабылдау, бойынша үздіксіз жұмысты қамтамасыз етіп, «Азаматтарға арналған үкімет» мемлекеттік корпорациясы коммерциялық емес акционерлік қоғамы мемлекеттік қызметтерін ауылдық пошта бөлімшелерінде ұсынады. Осы ретте, Түркістан облысында «Қазпошта» тарапынан салынатын заманауи ХАБ әрі инновациялық пошта терминалы әлемдік стандарттарға сәйкес болады деп жоспарлануда. Кездесуде осы бағытта да келіссөздер жүргізілді.
Түркістан облысы әкімінің баспасөз қызметі