“ҚҰЛАҚТАН КІРІП, БОЙДЫ АЛАР”
Қордай аудандық мәдениет үйінің ұйымдастыруымен 10 тамыз – ұлт руханиятының темірқазығы Абай Құнанбайұлының туған күніне орай Масаншы ауылдық мәдениет үйінде “Құлақтан кіріп, бойды алар” атты лирикалық ән кеші өтуде.
Лирикалық кеште өнерпаздарға қосылып тұрғындар да ән салып, өлеңдерін жатқа оқыды. Бай мұрасымен, философиялық мәні зор Абай Құнанбайұлының шығармалары қанша уақыт өтсе де, өзінің құндылығын ешқашан жоғалтпақ емес. Себебі Абай – қазақ үшін дара тұлға. «Көзімнің қарасы», «Айттым сәлем, Қаламқас» сынды лирикалық әндерін ауыл тұрғындары жарыса бірге орындады.
Ұлы Абай күні ақынның ұлылығын асқақтатып қана қоймай, ұлттық құндылықтарымызды ұлықтауға да негіз бола бастады. Лирикалық кеш әлі де жалғасып жатыр.