ШУ АУДАНЫНДАҒЫ КІТАПХАНА ОҚЫРМАНДАРЫ АБАЙ ОҚУЛАРЫНДА БАҚ СЫНАДЫ
Шу аудандық кітапханасының ұйымдастырумен 10 тамыз – Абай күніне орай «Асыл сөзді іздесең…» тақырыбында Абай оқулары өтті. Байқау барысында Хакім Абай туралы сыр шертіліп, Абай-алты алаштың, иісі қазақтың мақтанышы екендігі айтылды. Абай өлеңін жан-тәнімен, ыстық жүректерімен сүйетін оқырмандар сайысқа қатысып, ақынның жырларын оқыды.
Байқау үш кезеңнен тұрды. І кезең — «Мен кітапхананың тұрақты оқырманымын» сайыскердің өзін-өзі таныстыруы, ІІ кезең — «Өлең сөздің патшасы» ақынның кез келген өлеңін мәнерлеп жатқа айту, ІІІ кезең — «Әдеби бәйге» Абай Құнанбайұлының өмірі мен шығармашылығы туралы сұрақтарға жауап беру.
Сайысқа төрелік еткен әділ-қазылар алқасының шешімімен Бас жүлдені «Көкқайнар ауылы Саттар Естемесов атындағы орта мектебінің 7-сынып оқушысы Абаева Айзере иеленді. І орын — Шу қалалық С.Сейфуллин орта мектебінің 11-сынып оқушысы Серік Бейбарыс, ІІ орын — Төле би ауылдық М.Әуезов атындағы мектептің 9-сынып оқушысы Ертайқызы Еркеназ, ІІІ орын — Бірлік ауылы М.Х.Дулати атындағы мектептің 8-сынып оқушысы Дулатұлы Бағдатәли, Қонаев ауылы Д.Қонаев орта мектебінің 9-сынып оқушысы Мәдіхан Қорланға бұйырып, алғыс хатпен марапатталды.Шара соңында «Кемеңгерліктің биік шыңы — Абай» атты кеңейтілген кітап көрмесі ұйымдастырылып, библиографиялық шолу жасалды.