ЖАМБЫЛДАҒЫ ЖАҒЫМДЫ ЖАҢАЛЫҚТАР

Қазақстан Республикасының Конституциясы күніне орай Жамбыл ауданы Ақбұлым ауылында мәдениет үйі ашылды.

Мәдениет үйінің лентасы салтанатты түрде қиылып, ақ жаулықты әжелер шашуын шашты. Бұдан кейін көпшілік ғимаратты аралап, жас өнерпаздардың өнерін тамашалады.

Жаңа мәдениет ошағы 100 орынға шақталған. Құрылысы «Ауыл – Ел бесігі» жобасы аясында жүргізілді. Нысанның жалпы аумағы 550 шаршы метрді құрайды. Ғимаратта көрермен залы, кітапхана, түрлі үйірмелер өткізетін кабинет қарастырылған.

Жамбыл ауданында 25 мәдениет нысаны бар. Жыл соңына дейін Қызылқайнар ауылдық округінде де жаңа мәдениет үйі ашылады.

Айта кетейік, Жамбыл облысында 2024-2025 жылдары аралығында 17 мәдениет нысанының құрылысын жүргізу жоспарланған.

Ағымдағы жылы 7 мәдениет үйі мен 1 мұражайдың құрылысын аяқтау көзделуде. Келер жылы қалған 9 нысан пайдалануға беріледі.

Бұдан бөлек, 2 мәдениет үйіне күрделі, 14 мәдениет нысанына ағымдағы жөндеу жұмыстары жүргізілуде.

Сондай-ақ Конституция күніне орай Жаңатас қаласында 48 отбасы баспаналы болды. 1-шағынаудандағы 46-шы үй қайта жаңғыртылып, көпбалалы және аз қамтылған отбасыларға, баспана кезегінде тұрған азаматтарға тапсырылды.

Ал Байзақ ауданы Қостөбе ауылында демеушілердің есебінен шағын футбол алаңы ашылды. Жаңа спорт нысанында ауыл жастары арасында футболдан тартысты ойын өтіп, жеңімпаздар марапатталды.

30 тамыз – ҚР Конституциясы күні мерекесіне орай Тараз қаласы мен барлық ауданда салтанатты жиын өтіп, мәдени, спорттық және өзге де бұқаралық шаралар ұйымдастырылды.

Жамбыл облысы әкімдігі