Әкем естісе…

        Бір бақытты отбасы болатын. Кішкентай қыз және оның әкесі мен шешесі. Олар өте тату-тәтті өмір сүріп жатты. Соны көп көргендей ме, кенет анасы аяқ астынан сырқаттанып қалады. Біршама уақыт төсек тартып, жатып қалады. Тағдырдың жазғанына шараң бар ма? Ақыры пәни дүниемен қоштасады. Сәби күн сайын әкесінен: «Мамам қашан қайтып келеді?» деп сұрайтын. Ал әкесі қызын жұбатып: «Қызым, мамаң өте алыс бір жерге жұмысқа кетті», — деп құшақтап ұйықтататын.

Сөйте жүріп, қызы алты жасқа шыққан жылы, әкесі мейірбан, ақкөңіл бір әйелмен танысады. Бір күні әкесі қызына: «Қызым, мамаң қайтып келетін болды. Сен мамаңның түрін ұмытып қалған жоқсың ба?» — деп сұрады. Кішкене сәби ары ойланып, бері ойланып, басын шайқайды. Әке қызын аяп кетті әрі бір жағынан сәл де болса жеңілдеп қалғандай сезінді. Ол әлі де бала ғой. Дәл сол сәтте есік ашылып, әлгі әйел кірді де құшағын кең жайып, қыздың есімін шақырады. Сәл таңырқап, жатырқап тұрған қызына әкесі: «Қызым, мамаңды танымадың ба? Тез “мама” деп шақыра ғой» депті. Сәби ақырын адымдай басып барып, „мама” деп құшақтай алады.
Кешкі астан соң, әйел қызға ілесіп, оның бөлмесіне кіреді. Екеуі көңілді әңгімелесіп отырғанда қыз:

“Сіз менің мамам емессіз” дейді кенеттен. Әйел әрі тосырқап, әрі таңырқап қалды. Сәби қыз шошып қалған әйелдің қолынан ұстап, бәсең үнмен: «Менің мамам қайтыс болған. Мен оны атам мен әжемнің әңгімелерінен біліп алғанмын. Мұны тек атам, мен және әжем үшеуміз ғана білеміз. Әкем мен басқалар білмейді. Олар әлі күнге дейін мамамды тірі, алыс бір жерде жұмыс істеп жүр деп ойлайды». Жылап жіберуге шақ қалып тұрған әйелдің құлағына сыбырлап: «Бұл екеуміздің ортамыздағы сыр болсын. Әкеме айтып қоймаңыз. Ол білсе, қатты жылайды» дейді жаңа тапқан анасын құшақтап.

Бұларды есік сыртында үнсіз тыңдап тұрған әкенің көз жасы көл болған еді…

Дайындаған ЕлАна