«QazTehna»-ның автобустары көбейіп келеді

Жуырда Саран қаласындағы «QazTehna» ЖШС автобус және коммерциялық жабдықтар шығаратын зауытына бардық. Біз онда көлік шанақтарын дәнекерлеу, бояу, құрастыру және техниканы сынау желілерін қамтитын зауыттың өндірістік кешенімен таныстық.

Зауыт ішін аралау алдымен автобус қаңқасының негізгі бөліктері құрастырылатын дәнекерлеу цехынан басталды. Онда негізгі бөліктерін қосқаннан кейін автобустар 18 дәнекерлеу бекеті бар құрастыру желісіне өтеді. Желіде негізінен түрлі дәнекерлеу жұмыстары жүргізіліп, шанақты соңғы тазалау және тексеру сияқты операциялар орындалады.

Бояу цехында дәнекерленген қосылыстарды бояу, кептіру процестері жүріп, сосын автобустың қаңқасы бояу кабинасына кіргізіліп, қайталама праймер қолданылып, артынша кептіріледі.

Осы процестерден кейін автобустың шанағы тапсырысқа қарай қалаған түспен боялып, маркаланады. Одан кейін жылтыратыу, кішігірім ақауларды жою жұмыстары орындалады. Ал құрастыру цехында шасси және ішкі құрастыру желілерінде барлық бөлшектерді құрастыру процесстері жүреді.

Алдыңғы цехтардағы барлық кезеңдерді және қорытынды тексеруді аяқтағаннан кейін автобус сынақ алаңына жіберіледі.

Қазірде «QazTehna» зауытынан «Yutong» маркалы қалалық, туристік, қалааралық және арнайы мақсаттағы автобустар, «Sinotruk» және «Scania» брендтеріндегі коммерциялық көліктер шығарылады. 2021 жылы 165 жабдық, 2022 жылы – 568, 2023 жылы 1579 бірлік шығарылыпты. Биылғы жоспары 1 648 бірлікті құрайды.

Кәсіпорында жалпы саны 700-ден астам қызметкер еңбек етеді. Ал жұмыс орындарының саны 1 000-ға жетеді.

Компания қызметкерлерін оқыту үшін «QazTehna» ЖШС-да оқу орталығы жұмыс істеп тұр. Мұнда зауыт қызметкерлері 12 жұмысшы кәсіп бағытында білім алып, артынан сертификатқа ие болады. Осы арқылы олар кәсіби жетіліп, мансаптық өсуге мүмкіндік алады.

Компанияда шығатын өнімдер нарық сегменттерінің кең ауқымын қамтып отыр. Оның ішінде мектеп автобустары бар.

Өндіріс бастау алғалы зауыттан жалпы саны 428 мектеп автобусы шығарылған. Олар Ақтөбе, Түркістан, Қостанай, Қарағанды, Батыс Қазақстан, Алматы, Павлодар, Солтүстік Қазақстан, Ақмола, Ұлытау, Жамбыл, Жетісу облыстарына және Атырау, Көкшетау, Қызылорда қалаларына жөнелтілген.

Жасұлан БАҚЫТБЕКҰЛЫ