Созақта  футбол алаңы ашылды

1 желтоқсан Тұңғыш Президент мерекесі күні қарсаңында Оңтүстік Қазақстан облысы Созақ ауданының орталығы — Шолаққорғанда шағын футбол алаңы ашылды.

Спорт алаңының ашылуында құттықтау сөз сөйлеген аудан әкімі Салыхан Полатов былай деді: «Елбасы Н. Ә. Назарбаев Қазақстан халқына арнаған Жолдауында аудан, қала әкімдеріне «халықтың дене шынықтырумен және спортпен жаппай айналысуы үшін спорттық инфрақұрылымдардың қолжетімділігін кеңейту туралы мәселені шешуді тапсырамын» деген болатын. Бүгінде біз осы тапсырманы орындау мақсатында жұмыстар жасап жатырмыз. Мәселен, аудан бойынша 236 спорт ғимараты бар. Оның ішінде иппадром, теннис алаңы, жүзу бассейндері тұрақты жұмыс істеп келеді. Міне, бүгін тағы бір шағын футбол алаңын ашып, барша спорт сүйер қауымға жағдай жасап отырмыз».

Алаңның ашылу салтанатында аудандық мәслихаттың хатшысы Бегімбет Байғараев пен ардагер спортшы, Созақ ауданының Құрметті азаматы Аманғали Аймұрзаев жиналған спорт сүйер қауымды қуаныштарымен құттықтады. Аудандық бюджеттен 11 миллион теңгеге соғылған футбол алаңшасында жанкүйерлер отыратын орындық, жаңа қақпа, жасанды төсеніш салынған. Жаңа шағын футбол алаңында ауыл округтер арасында жасақталған командалар арасында футболдан жарыс жалауын желбіретті.

Елбасы қазақстандықтардың 30 пайызға жуығы бұқаралық спортпен қамтылуы керектігін міндеттеген болатын. Осыны жүзеге асыру мақсатында аудан басшысы әрбір елді-мекенде спорт алаңшалары мен спорт кешендерін салуды тапсырған. Жыл аяғына дейін Шолаққорған ауылында демеушілер есебінен тағы бір спорт алаңшасы ашылады деп күтілуде.

Е. РАЙЫМҚҰЛОВ,

ОҚО, Созақ ауданы.