Маңғыстау облысында құқық қорғау қызметтері орталығы ашылды

Маңғыстау облысында Елбасының «100 нақты қадам» ұлт жоспарының жүзінші қадамын орындау барысында құқық қорғау қызметтері орталығы ашылды.      Орталық құқықтық қызметті бір жерге біріктіріп, азаматтардың өтініштерін қарау жұмысын жаңа әрі сапалы деңгейге көтеруді көздейді.     Жалпы аумағы 680 шаршы метр құрайтын ғимарат «бір терезе» қағидаты бойынша арнайы орындармен және қажетті материалдық-техникалық құралдармен қамтамасыз етілген.     Жоба мақсаты — орталық азаматтардың мемлекеттік және құқықтық органдарға деген сенім деңгейін арттыру, атқарушы және құқық қорғау органдары мен халықтың арасындағы ашықтықты қамтамасыз ету.

Шараға қатысқан облыс әкімі Ералы Тоғжанов: «Ел Тәуелсіздігін алған кезеңнен бастап мемлекетімізде заңдылықтар мен қоғамдық тәртіптің жағдайын, Конституция мен заңдарды мүлтіксіз сақтауды Елбасы халқымыздың алдына басты мақсат етіп қойды. Қоғамның бірқалыпты өмір сүруі, елдегі тәртіп пен тыныштықтың орнауы ең әуелі құқық қорғау органдары саласының қызметіне тікелей байланысты. Халықтың құқық қорғау органдарына деген сенімін арттырып, Елбасы қойған мақсаттарға жету үшін бірқатар жұмыстар атқарылып келеді. Тәуелсіздік күніне орай біздің облысымызда Құқық қорғау қызметтері орталығы құрылып, 12 мекеменің мамандары тұрғындарға ақысыз түрде  құқықтық қызмет көрсететін болады. Бұл қызметкерлер Сіз тарапынан қойылған сұрақтар мен барлық мәселелерді заң аясында шешуге және көмек көрсетуге әрқашанда дайын»,-деді.

Құқықтық мәселелер бойынша тұрғындарды қабылдауды тәжірибелі прокурорлар жүргізеді. Азаматтардың өтініштерін қарауды тиімді ұйымдастыру үшін 8 мемлекеттік органның қызметкерлері тартылған, оның ішінде: облыс әкімдігі, жергілікті полиция қызметі, қылмыстық-атқару жүйесі, еңбек басқармасы, мемлекеттік кірістер департаментінің және т.б., сондай-ақ адвокаттар, нотариустар, медиаторлар және психологтар.

Айман Оңғарбайқызы