Елбасының сәлемін жеткізді
Павлодар облысының әкімі Болат Бақауов Баянауыл ауданына арнайы ат басын бұрып, өңір ақсақалдарына Елбасы Нұрсұлтан Назарбаевтың сәлемін жеткізді. Жақында Павлодар облысына жұмыс сапарымен келген Мемлекет басшысы Баян өңіріне арнайы бара алмайтынын айтып, осы өңірдегі қарияларды Елордаға келуге шақырған болатын.
Кездесу Торайғыр ауылы маңындағы Кемпіртас шатқалында орнатылған алты қанат ақ ордада болды. Аймақ басшысымен жүздесуге Баянауыл ауданының әлеуметтік-экономикалық, өнер мен мәдениет және ағарту саласының дамуына зор үлес қосқан көнекөз қариялары – Баянауыл ауданының Құрметті азаматтары ардагер ұстаз Зекебай Солтанбаев, Майқайың соғыс және еңбек ардагерлері кеңесінің төрағасы Мұхтар Әбенов, Социалистік Еңбек Ері Сағадат Ысқақов, еңбек ардагері Бекет Есманов, еңбек ардагері, «Баянауыл аудандық ақсақалдар кеңесі» қоғамдық бірлестігінің төрағасы Мұрат Рахметов, Баянауыл ауданының алғашқы әкімі, Қазақстан Республикасының «Құрмет» орденінің иегері Қорабай Шәкіров, еңбек ардагері Сайлау Байдильдин, «Ерен еңбегі үшін» медалінің иегері Әнуарбек Кісентаев, Баянауыл ауылы қоғамдық кеңес төрағасы Ғайниден Жұманов, аудандық ардагерлер кеңесінің төрағасы Бейсенбек Камашев, зейнеткер Айнабай Жортуылов келді.
Болат Жұмабекұлы бір күндік жұмыс сапары барысында облыстың дамуына оң баға берген Елбасының баянауылдық ақсақалдар жайлы айтқан жылы пікірінің жазбасын көрсетті. Мемлекет басшысы өз сөзінде уақыттың тығыздығына байланысты Баянауыл өңіріне бара алмайтынын айтып, мұндағы ел ағаларын Астанаға шақырды.
-Жоспарымда Баянауыл өңіріне арнайы бару бағыты бар еді. Өзімнің жұмыс кестемді өзгерткеніме байланысты кешірім өтінемін. Баянауылда мені бұрыннан білетін ақсақалдар бар. Менің Баянауылға бармағаныма көп уақыт болыпты. Сондықтан баянауылдық ақсақалдармен Астанада арнайы кездескім келеді, — деді Елбасы Нұрсұлтан Назарбаев.
Елбасының осындай сөзін естіген баянауылдықтар да бір марқайып қалды. «Елбасының облысымыздың дамуын оң бағалап, бізге арнайы сәлем жолдауы – елге деген құрметі. Ал, бұл – баршамыздың мерейіміз», — деген пікірлерін білдірді. Ақсақалдармен кездесу барысында Болат Жұмабекұлы аудан ақсақалдарына «Павлодар облысы. Жер жәннаты» энциклопедиялық кітабын сыйға тартты.
Өз тілшімізден.