Павлодар мемлекеттік педагогикалық университетінде жаңа оқу жылы басталды

Павлодар мемлекеттік педагогикалық университетінде жаңа оқу жылының алғашқы күні атап өтілді. Салтанатты жиынға университет проректорлары, ЖОО-ның қызметкерлері, оқытушылар мен студенттер қатысты.

Oқу-әдістемелік жұмыс жөніндегі проректор Текжанов Қайрат бірінші курс студенттерін алғашқы оқу жылымен құттықтап сөз сөйледі.

Биылғы жылы университет оқу жылын жаңа қарқында бастады. ЖОО педагогикалық бағытта 63 мамандық бойынша студенттерді даярлайтын болады. Білімін ары қарай толықтырамын деушілерге магистратура мен докторантура бар. Былтырғымен салыстырғанда оқу гранттары да молайған. Қабылданған 2224 студенттің ішінде мемлекеттік грант бойынша ақысыз білім алатындар саны – 813 адам.

Айта кету керек, биылғы жылы ПМПУ білім сапасы жағынан Қазақстанның педагогикалық оқу орындарының арасында екінші орынға ие болды. Сондай-ақ биылдан бастап университет базасында колледж түлектер дайындайтын болады.

Оқуға түскен жастар қатарында республикалық олимпиадалардың жүлдегерлері мен халықаралық спорттық жарыстардың жеңімпаздары бар. ПМПУ туын салтанатты шараға алып шығу құрметі пауэрлифтингтен 2017 жылғы әлем чемпионы Жургина Анастасияға табысталды.

Бірінші курс студенттерін жаңа оқу жылымен құттықтау шарасы мерекелік концертпен жалғасын тапты. Университет филармониясының өнер ұжымдары әсем ән мен күмбірлеген күйден шашу шашты.

Әлихан Рахметоллаұлы