«Павлодар облысының қасиетті жерлері балалар көзімен»
Облыстық көркемсурет музейінде «Павлодар облысының қасиетті жерлері балалар көзімен» атты облыстық суретшілер байқауының қорытындысы шығарылып, жеңімпаз атанған жас суретшілердің жұмыстары көрмеге қойылды. Жас суретшілер сайысы облыстық білім беру басқармасының ұйымдастыруымен өтті.
«Павлодар облысының қасиетті жерлері балалар көзімен» жобасы Елбасының «Рухани жаңғыру» бағдарламасы аясында ағымдағы жылдың ақпан айында басталған екен. Мақсаты- жас жеткіншектерге өңіріміздің қасиетті орындарын, тарихи жерлерін таныту. Жоба аясында білім беру мекемелері аудандар мен ауылдарға көшпелі пленерлер ұйымдастырылды. Осы шара барысында жас суретшілер Ертіс-Баян өңірінің таңғажайып табиғатын тамашалап, тарихи және мәдени ескерткіштерімен танысты. Жас суретшілер өздерінің көрген-білгендерін, ойға түйгендерін қылқалам арқылы қағаз бетіне түсіріп отырды.
Сурет байқауына облыстағы балалар көркем-сурет және өнер мектептерінің оқушыларынан 70-тен астам жұмыс түсті. Көрме-байқауының ашылу салтанатына облыстық білім беру басқармасының басшысы Дінислам Болатханұлы қатысып, жас өнерпаздардың алдағы шығармашылық жұмыстарына мол табыс тіледі.
Музей маманы Бақытгүл Әділханның сөзінше, байқауға қабылданған жұмыстар әртүрлі жанрда салынған.
— Әсіресе, қарындашпен, су және майлы бояумен салған туындылар көп. Сонымен қатар, ермек сазбен, иірілген жіппен түрлі-түсті қағазбен жасалған жұмыстар бар. Сурет көрмесіне қойылған жұмыстардың әрқайсысының өзіндік ерекшеліктері бар. Ерекше қиялмен, ерекше шеберлікпен салынған қылқалам туындалырн көруге болады. Мысалы, Баянауыл ауданындағы Кемпіртас, Жасыбайдың жерленген жері, Екібастұздың Ақкөліндегі Исабек Ишан кесенесі, Шарбақтыдағы Қабдул-Уахит хазрет кесенесі сынды қасиетті орындарды тамаша суреттеген, — дейді көркем-сурет музейінің маманы Бақытгүл Әділхан.
Облыстық білім беру басқармасы мамандарының мәліметінше, Ертіс ауданынан келген Руффат Муратов, Гора Любовь, екібастұздық Мадина Шавдирова, Снежана Гаджиева, Арина Болих, Ақтоғайдан келген Регина Болатова сынды оқушылар жеңімпаз атанды.
Тілеуберді САХАБА