2018 жылдағы Қазақстан спортындағы басты оқиғалар

2018 жылы қазақстандық спортшылар Оңтүстік Кореяда өткен ақ Олимпиада мен Индонезияда өткен жазғы Азия ойындарына қатысты. Сондай-ақ, ІІІ жасөспірімдер Олимпиадасында жас спортшылар намысты қолдан бермеді. Кәсіпқой боксшы Геннадий Головкин үшін 2018 жыл оңай болмады. Ал Денис Тен 25 жасында ұрылардың қолынан қаза тауып, әлем жұрты аза тұтты.

Пхенчхан-2018.
Могулшы Юлия Галышева Олимпиаданың қола медалін жеңіп алды. Жүлдегерге ҚР Үкіметі 75 мың АҚШ доллары сыйақы берді. Фристайлдың могул түрінен фаворит саналған Дмитрий Рейхард жүлдесіз қалды. Осымен төртінші Олимпиадасына қатысқан шаңғышы Алексей Полтораниннің де жолы болмады. Ал қысқы Паралимпиада ойындарында шаңғышы Александр Колядин алтын медальға ие болды. ҚР Үкіметі чемпионға 250 мың АҚШ долларын табыс етті.

Геннадий Головкин.
2018 жылы 5 мамырға жоспарланған Головкин мен Канело арасындағы реванш мексикалықтың сынамасынан тыйым салынған препарат табылғандықтан өтпей қалды, Альварес жарты жылға бокстан шеттетілді. Көп күтіп отырмай Головкин жаңа қарсылас таңдап, сол 5 мамыр күні америкалық Ванес Мартиросянмен бокстасып, қарсыласын екінші раундта нокаутқа түсірді. Қазақстандық боксшы 38-і жеңісіне қол жеткізсе, Ванес Мартиросян карьерасындағы 4-і жеңілісіне ұшырады. Головкин бұл жекпе-жекте 19-ы рет WBA, 17-і рет IBO және 4-і рет WBC титулын қорғады. Алғашқы жекпе-жектен кейін араға бір жыл салып Головкин мен Альварес реваншы 15 қыркүйекте өтті. Бұл жекпе-жекте Головкин төрешілердің шешімімен кәсіпқой бокстағы карьерасында алғаш рет жеңіліс тапты. Судьялар шешімі: 115:113, 114:114, 115:113. Үшінші жекпе-жек қашан өтетіні белгісіз.

Денис Тен.
Мәнерлеп сырғанаушы Денис Тен Пхенчхан Олимпиадасында еркін бағдарламаға өте алмады. Себебі спортшыны жарақаты мазалаған. Ол 9-ы маусымда Астанада «Денис және оның достары» атты дәстүрлі шоуын өткізіп, онда мәнерлеп сырғанау спортындағы әлемдік жұлдыздар мұз айдында өнер көрсетті. Бұл Денистің соңғы шоуы еді. 2018 жылдың 19-ы шілдесінде қазақстандықтар қапыда Сочи Олимпиадасының қола жүлдегері Денис Теннен айырылып қалып, қара жамылды. 25 жасында спортшы автокөлік ұрыларының қолынан қаза тапты. Денис Теннің өліміне қатысты іс тергеліп жатыр. Бүгінде Денис Тен атындағы қор жұмыс істейді. Қордың қолдауымен Астана және Алматы қалаларында D10 World көрмесі өтті. Көрмеге спортшының жеке заттары, өзі түсірген фотосуреттері, Денистің фотолары қойылды. Сондай-ақ, келушілер планшеттен Денис жазған әндерді тыңдау мүмкіндігіне ие болды.
Жазғы Азия ойындары.
Джакартада 18 тамыз бен 2 қыркүйек аралығында жазғы Азия ойындары өтті. Қазақстан құрамасы Индонезиядан 76 медальмен оралды, оның 15 – алтын, 17 – күміс және 44 – қола. Жалпы есепте 9-ы орыннан көрінді. Қазақстан құрамасы сапында алғашқы «алтынды» семсерлесуден Дмитрий Алексанин әкелді. Ол финалда Рио Олимпиадасының чемпионы Пак Сан Енаны жеңді. ҚР Үкіметі Азия ойындарында алтын медаль үшін – 10 мың АҚШ доллары, күміс үшін – 5 мың, ал қола үшін – 3 мың доллар табыстады. Жазғы Азия Пара ойындарында Қазақстан құрамасы 33 медальмен жалпы есепте 13-і орыннан көрінді. Қазақстандық спортшылар спорттың алты түрінен 5 алтын, 15 күміс, 13 қола жеңіп алды.

Илья Ильин спортқа қайта оралды.
Сынамасынан тыйым салынған заттар табылған ол екі жылға жарыстардан шеттетілген еді. 2018 жылдың 10 маусымында жаза мерзімі аяқталып, Илья Ильин спортқа оралатынын мәлімдеді. Спортшы Токио Олимпиадасына қатысып, топ жаруды қалайтынын айтты. Талдықорғанда өткен ауыр атлетикадан ел біріншілігінде «алтын» алған ол әлем чемпионатына қатысатын болды. Алайда жарақатына байланысты чемпионатқа спортшы емес, бапкер ретінде қатысты.
Жасөспірімдер Олимпиадасы.
6-18 қазанда Буэнос-Айресте өткен Олимпиадаға Қазақстаннан спорттың 23 түрінен 58 спортшы қатысты. Жалпы есепте 10 медаль (алтын– 4, күміс– 3, қола– 3) алған Қазақстан құрамасы 14-і орыннан көрінді. Сондай-ақ, Роза Абитова көркем гимнастикадан халықаралық аралас команда сапында өнер көрсетіп, күміс медальға ие болды. Дзюдошы Бекарыс Сәдуақас халықаралық аралас сында «Лондон» командасымен бірге қола медаль алды.

Ермек Назым