Павлодарда қажылар қауымдастығы 300 адамға ауызашар берді

Белгілі дінтанушы, ақын, шежіреші, ғұлама Мәшһүр Жүсіп Көпейұлы атындағы орталық мешітте аймақтың қажылар қауымдастығының ұйымдастыруымен 300 адамға ауызашар берілді, деп хабарлайды pavlodarnews.kz. Бұл туралы орталық мешіттің баспасөз қызметі хабарлады.

— Бүгінгі ауызашарға қажылық парызын өтеген ата-апалар, басқа да әлеуметтік топтағы адамдар, жастар өкілдері де түгелдей қамтылды, — дейді қалалық қажылар қауымдастығының төрайымы Рымтай қажы Сапарбекқызы.  — Ауызашар ораза тұтушылардың құрметіне, сонымен қатар Қазақстан қажылар қауымдастығы орнауының 15 жылдық мерекесі құрметіне орайластырылды. Сондықтан да соңғы бірнеше жыл бойы қажылар қауымдастығы тарапынан ұйымдастырылып келген әртүрлі мәдени-иләһи іс-шараларға белсенді атсалысып жүретін қажыларды «Қажылар қауымдастығына-15 жыл» төсбелгісімен және алғыс хаттармен марапаттадық.

Ауызашарда қалалық «Ақмешіт» мешітінің бас имамы Нұрлан Евфратұлы жиналған қауымға тәлімді уағыз айтса, мешіт шәкірттері — жас қарилер бабалар рухына Құран бағыштады. Сонымен қатар қаланың құрметті ақсақалдары, ата-апалар өз лебіздерін білдіріп, жиналған қауымды қасиетті Рамазан айының келуімен құттықтап, әр мұсылманға парыз болған оразаны шариғатқа сай тұту, ниетті түзеу, тарауых намазын оқу, Алланың көрсеткен адал жолымен өмір сүруге қатысты ақыл-кеңестерін айтты.

Дастархан басында көп жылдар бойы қалалық қажылар қауымдастығы төрайымы міндетін абыроймен атқарып, талай игі істерге бастамашы болған ұлағатты ұстаз Рымтай Сапарбекқызына да қажылар қауымы өз сый-сияпаттарын ұсынды. Берекелі дастарханның соңында имамдар ата-бабалар рухына Құран бағыштап, данагөй қариялар елімізге тыныштық, халқымызға береке тілеп бата қайырды.

Әлихан Рахметоллаұлы