Шымкентте жеті метрлік «Домбыра» ескерткіші орнатылды  

Шымкент қаласында «Ұлттық домбыра күні» мерекесіне орай «Домбыра» ескерткішінің ашылу салтанаты өтті. Шараға қатысқан қала әкімі Ғ.Әбдірахымов қасиетті қара домбыра — қазақтың рухы және болмысы екенін атап өтті.

«Түркістан» сарайының алаңында ұлттық аспабымызды ұлықтау мақсатында орнатылған ескерткіштің авторы — Шымкент қаласының суретшілер одағы. Туындының биіктігі 7,5 метр, ені 1,5 метр.

Ескерткіштің бір ерекшелігі — жанына жақындаған кезде қазақтың күйі орындалады. Шымкенттіктер енді мұнда 30-ға жуық күй тыңдап, аспаптың қоңыр үнінен тамаша әсер ала алады.

Мерекелік шарада жергілікті өнерпаздар сан сырлы күй әуенімен тыңдармандарға ерекше көңіл-күй сыйлады.

Еске салсақ, Елбасы  Нұрсұлтан Назарбаев шілденің бірінші жексенбісін   «Домбыра күні» деп белгілеп, 2018 жылы  13 маусым күні жарлыққа қол қойған болатын.