Карантин шаралары елорда дәрігерлерінің жүктемесін азайтты

Нұр-Сұлтанда 5 шілдеде карантин шаралары енгеннен бері, медицина қызметкерлері мен медициналық мекемелердің жүктемесі төмендеді. Егер бұрын күніне 500-ге жуық науқас келіп түссе, қазір екі есе төмен көрсеткіш байқалады. Сауығып кеткендердің саны да 2 есе артып, бүгінде күніне 400-ге жуықтады. Сонымен қатар жедел жәрдем станциясына келіп түскен шақыру тәулігіне 2800-ден 1600-ге дейін азайды. Сондай-ақ пневмониясы бар науқастар 14% азайды. Қабылданған карантин шаралары мен амбулаторлық емдеу нәтижесі арқасында төсек-орын қажеттілігі 99%-дан 73%-ға дейін төмендеді. Мәселен, «Орталық теміржол ауруханасында» карантинге дейін Covid-19 анықталған 230 науқас болса, қазір 124 науқасқа дейін, №1 қалалық ауруханада науқастар саны 760-тан 500-ге дейін, №3 қалалық ауруханада 475-тен 320 науқасқа дейін қысқарды. Пандемия басталғаннан бері стационарлар саны 3-тен 14-ке дейін артты. Бұл – 4 мыңға жуық төсек-орын. Қалада коронавирус жұқтырған 6899 науқас тіркеліп, оның жартысынан көбі яғни, 4321 науқас емделіп шықты. Қала әкімдігімен дәрі-дәрмек, медициналық құрал-жабдықтар, жеке қорғаныс құралдары, т. б. сатып алу бойынша тұрақты жұмыстар жүргізілуде. «Қатаң карантин шараларын бұзбау қаншама адамның өмірін сақтап қалуға болатынын көрсетеді. Тек санитария нормаларын сақтаған кезде (маска тағу, әлеуметтік қашықтық сақтау және адам көп жиналатын жерлерге бармау) коронавирус инфекциясының таралу қаупін едәуір төмендетуге болады. Біздің парызымыз – адам өмірін құтқару. Бірақ жақындарыңыз бен туыстарыңыздың денсаулығы өздеріңізге де байланысты. Әр адам күн сайын қауірсіздік шарасын қатаң сақтап, жауапкершілік танытуы керек. Сонда ғана біз вирусты жылдам жеңе аламыз», – деп атап өтті қалалық қоғамдық денсаулық сақтау басқармасы.