Қыдыралыұлы: Келісіп пішкен тон келте болмайды
Аудан әкімі Ерлан Қыдыралыұлы аудандық Қоғамдық кеңесінің жаңа құрамымен кездесу өткізді. Кеңес мүшелерімен емен-жарқын әңгімелесіп, елге ортақ өзекті мәселелерді талқыға салды. Шешімін күткен түйткілді мәселелер де жоқ еместігін ашық айтып, шешу жолдарын жан-жақты қарастырып жатқанын жеткізді.
– Бұрындары әкімдер жылына бір-ақ рет есеп беретін. Биылдан бастап формат өзгертілді. Енді әкімдер тоқсан сайын халықпен кездесулер өткізіп, атқарылған жұмыстар бойынша есеп береді. Өткен кездесулерде көтерілген мәселелерді зерделедік. Арасында шешілген мәселелер де бар. Түйіні тарқатылғанымен, шешілмей жатқан мәселелер де жоқ емес. Барлығын бір жылда шеше алмаймыз.
Бұл мүмкін емес. Бұны ашық айтумыз қажет. Халықты алдамау керек. Кез келген мәселенің басын ашып, түсіндіріп айтсақ, халық бізді түсінеді. Мәселелер бірден емес, өзектілігіне қарай кезең-кезеңімен шешіледі. Біз өзіміз бұған мүдделіміз. Сөзімізді ісімізбен дәлелдейік. Сонда ғана халықтың бізге деген сенімі артады.
Мен өзім осы өңірдің азаматы болған соң жергілікті жұртшылықтың мұң-мұқтажын жақсы білемін. Есепті кездесулерде бірқатар мәселе көтерілді, бәрін де назарға алдым.
Ең өзектісі – жол, ауызсу, газ. Бүгінде бұл бағытта жұмыс жасалып жатыр. Өзге де мәселелер бойынша тиісті жұмыстар жүргізілуде.Қоғамдық кеңестің қоғамдағы рөлі ерекше. Кеңес мүшелері елге сыйлы беделді азаматтар. Бұны бәріміз жақсы білеміз. Ел-жұрттың ішінде көп жүресіздер. Ауылдағы ағайынды бірлікке, ынтымаққа үндейтін де, жақсысын асырып, жаманын жасыратын да, бұзығын тәртіпке салатын да өзіңізсіздер. Келісіп пішкен тон келте болмайды. Біз бірлесіп жұмыс жасаумыз керек. Барлығымыздың көздегеніміз бір, ол – ауданымызды өсіп-өркендету. Мен үшін бұл аса маңызды. Ортақ істе жеке бастың мүддесі деген болмайды. Соны түсінгеніміз жөн. Біз жөнсіздікке жол бермейміз. Ауданның, елдің игілігі үшін бірге жұмыс жасаймыз, – деді Ерлан Қыдыралыұлы өз сөзінде.