Ақтоғай ауданында «Асар» дәстүрімен асхана ашылды

Ақтоғай ауданы Қожамжар Ауылдық округінің Жамбыл ауылында «Болашаққа бағдар: рухани жаңғыру» бағдарламасы аясында 250 орынға шақталған асхана ашылды, деп хабарлайды  pavlodarnews.kz тілшісі

-Нысанның құрылысы екі жыл жүргізілген болатын, -дейді Қожамжар ауылдық округінің әкімі Серік Тезекбаев. -Бұл әсем ғимарат елді мекеннің сәнін келтіріп қана қоймай , ауыл тұрғындарының жарқын келешекке деген сенімін нығайтты. Қазақы ортада ауқымдыда күрделі жұмыстарды бірлесе атқару харекетін  «Асар» дәстүрі деп атайды. Аға буынның осы бастамасы өскелең жас ұрпақты еңбекке баулып , сыйластыққа , қамқорлық танытуға, туған жерді, елді құрметтеуге ,өз елінің шын патриоты болып өсуге септігін тигізеді деп білемін. Мұндай әрекетті адам санасының рухани жаңғыруы деп атасақ болады. Абызбай Аманов, Қожамұрат Омаров және Баитовтар бастаған жерлес кәсіпкерлер мен ауыл тұрғындарының қардылай демеушілігімен салынған құрылыс жұмыстарына 9,5 млн қаражат жұмсалған. Бұл азаматтардың барлығы Астана, Павлодар және басқа аймақтарда тұрғанымен, туған жерге тағзым ретінде ауыл тұрғындарына осындай сый жасауды жөе көрген.

Ақтоғай ауданында барлығы үш асхана жұмыс істесе, бұл аудан бойынша ауылдардың арасында ашылып отырған алғашқы асхана. Жамбыл ауылында барлығы 200-ден астам адам тұрады. Салтанатты ашылу шарасына қатысқан аудан әкімінің орынбасары Ермек Машырықов ауыл асханасына музыкалық аппаратура сыйға тартты.

Көптен күткен нысанның ашылуына 400-ден аса ауыл тұрғыны жиналып ,соңы ұлан асыр тойға ұласты.

Ақбота Сейсенбаева