Ақтауда «Ұлы дала мұрагерлері» домбырашылар флешмобы өтті

Ақтау қаласындағы Назарбаев Зияткерлік мектебінің оқушылары «Ақтау» сауда  ойын-сауық кешенінде дәстүрлі «Ұлы дала мұрагерлері» флешмобын өткізді. Олар қазақтың танымал күйлерін орындап, ән айтты.

—Үшінші жыл қатарынан ұйымдастырылып отырған флешмоб республикадағы барлық зияткерлік мектептерде өтіп жатыр. Бірлескен жобаның басты мақсаты- көпшілікті мерекемен құттықтау, егеменді еліміздің еркін ұрпақтарының өнерін таныстыру, — дейді мектеп директорының тәрбие ісі жөніндегі орынбасары Алтынзер Ихсанова.

Биылғы флешмобтың ерекшелігі, күмбірлетіп күй орындайтын оқушылар санының артуы болып отыр. Шарада 35 күйші Құрманғазының «Сарыарқа», «Адай», «Балбырауын» күйлерін орындады. Сондай-ақ, Нұрғиса Тілендиевтің «Ата толғауы», «Әлқисса» күйлері де көрерменнің көңілінен шықса, «Керемет» би ансамбілінің тәрбиеленушілері «Аса таяқ» биін биледі.

Айман Оңғарбайқызы