Алматы облысында қоқыстан энергия өндіретін зауыт салынып жатыр
Елімізде «Жасыл» экономикаға көшуі жөніндегі тұжырымдаманың қабылданғанына биыл 11 жыл толды. Қазіргі таңда Қазақстанда аталмыш Тұжырымдаманың 2020–2030 жж. қарастырылған 2- кезеңін жүзеге асыру үстіндеміз. Мұндағы басты мақсат- «табиғи қорларды тиімді пайдалану, жоғары технологиялар базасында жаңартылатын энергетиканы енгізу»- болып табылады.
Қоршаған ортаны қорғау, тұрмыстық қалдықтарды жою әрі оны кәдеге жарату сынды бір-бірімен тығыз байланысты болып отырған бұл жобалардың төңірегінде қазіргі күні талай игі істер қолға алынып жатыр. Соның бір мысалы ретінде Алматы обылсы Талғар ауданы аумағында жылына 350 тонна қоқыс өңдей алатын зауыт салынып жатқандығын айта кеткен жөн. Құрлысы 2025 жылы аяқталады деп жоспарланған бұл зауыт «Жасыл экономика» бағдарламасы аясында жүзеге асырылып жатыр. Жалпы құны — 32 млрд.теңгеге бағаланған. Жаңдан ашылатын бұл зауыт толық іске қосылғаннан кейін құрылыс қалдықтарын сұрыптайды және қайта өңдейтін болады. Бұдан да маңыздысы- зауытта қатты тұрмыстық қалдықтарды, темірбетон бұйымдарын жағу арқылы сағатына 16 мегаватт электр қуатын өндіретін болмақ.
Елімізде мұндай жобаларды мемлекет тарапынан қолдау қызметі жақсы жолға қойылғандығын айта кеткен жөн. Стратегиялық маңызды жобаларды жүзеге асыру үшін мемлекет төмен пайызбен несие беру, құрлыс жұмыстары аяқталғанша канику мерзімін белгілу сынды жеңілдіктер қарастырған. Себебі Қазақстанда қоқыстарды өңдеу, сұрыптау одан энергия өнідіріп шығару жұмыстары енді жолға қойылып келе жатыр. Мысалы 2023 жылы еліміз бойынша 4 миллион тоннадан астам коммуналдық қалдықтар шыққан болса, соның 1 миллионы ғана өңдеуге жіберілген. Ал, Алматы облысының бойынша жыл сайын шамамен 430 мың тоннаға жуық қоқыс шығарылатын болса соның тек 100 мың тоннадайы ғана қайта өңдеуге алынады екен.
Дайындаған: Ерқазы Сейтқали