«Ауыл көшбасшылары» обасының қатысушылары бас қосты

Ақтауда Елбасымыздың «Болашаққа бағдар: рухани жаңғыру» мақаласы аясында «Жаңа ұрпақ» республикалық көшбасшылар мектебінің «Ауыл көшбасшылары» арнайы жобасына қатысқан оқушылардың еңбегін таныстыру шарасы өтті. Өңірдегі ауыл мектептерінің оқушылары қатысқан шараға облыс әкімінің орынбасары Руслан Сәкеев қатысты.

Аталған жоба республиканың барлық ауылдық аймақтарын қамтиды. Байқау Маңғыстауда бір ай бұрын басталған. Ауылдарды аралап, тренингтер өткізіп, отыз күн көлемінде әлеуметтік жобаларды жүзеге асыратын топтар ұйымдастырылған.

-Аталған жоба облыс әкімі Ералы Тоғжановтың қолдауымен ұйымдастырылып отыр. Жоба аймақта алғаш рет өткізілуде. Жастардың білімі мен біліктілігін артатын «Жаңа ұрпақ» жобасына қатысушыларға сәттілік тілеймін,-деді шарада сөз алған облыс әкімінің орынбасары Руслан Сәкеев.

Ұйымдастырушылар жоба негізінде 92 ауылдық мектептерде 68 шеберлік сағатын өткізген. Он күн көлемінде өткен шеберлік сағатына 7900 оқушы қатысып, оқушылар өзіне деген сенімділікті ұялатқан. Кездесуде облыс бойынша 9-10 сынып оқушыларынан құралған 56 топ жобаларын таныстырып, бейнеролик көрсетті. Аталған топтың ішінен 10 жоба іріктеліп, алынады. Тәлімі мен тағылымы мол байқауға оқушылар жоғары деңгейде дайындалғаны байқалды.

Мәселен, Бейнеу ауданы №4 мектебінің 10 сынып оқушысы Жанар Балманова «Жедел жәрдем» жобасын дайындаған. Жоба — үлгерімі төмен оқушылардың сабақ барысында түсінбеген тақырыптарын оларға кеңінен түсіндіру мақсатында қолға алынған .

-Жастардың өз ауылдары, мектебі үшін еңбегін сіңіріп, оның өркендеп дамуына сәл болса да өз үлестерін қосу- азаматтық міндеті. Оқушылар бір айдың ішінде әлеуметтік, кәсіби, білім бағытындағы өз жобаларын дайындады. Үздік деп танылған жоба авторларына Алматы қаласына 7 күндік «Көшбасшылық жаңғыру» лагеріне жолдама табысталады. Топ жарған балалар лагерьде демалып қана қоймай, білім көкжиектерін кеңейтетін болады, — деді «Жаңа ұрпақ» көшбасшылар мектебінің «Ауыл көшбасшылары» жобасының жетекшісі Алмас Күмісқалиев.

Айман Оңғарбайқызы