Ауылдағы ағайынның ахуалымен танысты

Жамбыл облысындағы «Бейбітшілік және келісім» жобасы негізіндегі кезекті кездесуі ағымдағы жылдың 5 желтоқсанында Меркі ауданының Ойтал, Жамбыл, Ақарал ауылдарында жалғасты.
Жамбыл облысы әкімдігінің ішкі саясат басқармасының облыстық Қазақстан халқы ассамблеясының хатшылығы-этносаралық қатынастар мәселелері жөніндегі бөлімінің басшысы Құдайберген Рысдәулетов, «Қоғамдық келісім» КММ басшысы Мүбарак Жинақбаева және осы мекеме қызметкерлері ауыл ақсақалдары, ардагерлер, билер кеңесінің төрағалары, көп балалы батыр аналар, этнос өкілдерінің басшылары мен белсенділері, қандастар, жастар ресурстық орталығының өкілдерімен кездесіп, ауылдағы ағайынның ахуалымен танысты.
Кездесудің басты мақсаты облыс аймағындағы этнос өкілдері тығыз орналасқан этнокарта негізінде этносаралық жай-күйді зерделеу болатын.
Мақсатқа сәйкес жиын барысында саяси реформалардың, Жаңа Қазақстаннның идеялары мен құндылықтарының маңызы, жалпыелдік «Бірлік даму үшін!» ұранымен этносаралық келісім түсіндіріліп, округ тұрғындарының түйіткілді мәселелері тыңдалды. Қоғамдық келісім мен ұлттық бірлікті нығайту, этносаралық қақтығыстардың алдын алу бойынша жұмыстар жүргізу және өңірлік этнос пен конфессияаралық жағдайлар проблемалық мәселелерді анықтау, оларды шешу бойынша ұсыныстар әзірленді.
Кездесу барысында жаңа Қазақстанның өзекті реформаларының, идеялары мен құндылықтарының маңызды аспектілері талқыланды. Этносаралық келісім туралы айтылды. Ауылдардағы проблемалар көтеріліп, оларды шешу жолдары ұсынылды.
Іс – шараға белсенді қатысушылардың арасында жастар да бар. Осы санат үшін «Қоғамдық келісім» КММ ҒСТ бас сарапшысы Ербол Қаншымбеков, жастар ісі жөніндегі маман Рахат Ержанұлы тимбилдинг өткізді.
Көп балалы Батыр аналар да назардан тыс қалмады. Олармен этносаралық қатынастар саласындағы әдістемелік қамтамасыз ету және мониторинг бөлімінің басшысы Аққу Қаратаева кездесіп, мәселелері тыңдалды және шешу жолдары қарастырылды.

Дедек Төлен