BatysIndustry 500-ден астам өнім түрін шығарады

Орал қаласында мұнай-химия өнеркәсібіне арналған технологиялық құрал-жабдықтар өндіретін BatysIndustry кәсіпорнында цифрлық басқару жүйесі бар термиялық кескіш станок іске қосылды. Ал QazIndustry оралдық кәсіпорынның цифрлық машина құнына кеткен қаржысы сомасының жартысына жуығын өтеп берді.

Нақтырақ айта кетсек, өнеркәсіпті мемлекеттік ынталандыру шаралары негізінде BatysIndustry компаниясы «QazIndustry» АҚ-ның қолдауымен жабдыққа кеткен шығындарының 40 пайызын өтей алды. Кәсіпорын өтелген соманы өндірісті одан әрі дамытуға жұмсады.

Зауыт мұнай мен газды өңдеуге арналған жабдықтар мен құрамдас бөліктерді – өшіру клапандарын, жылу алмастырғыш жабдықтарды, ауа салқындату қондырғыларын, цистерналар мен резервуарларды, аппараттық бұйымдарды шығарады.

BatysIndustry басшылығы QazIndustry өкілдерімен болған кездесулердің бірінде саланы мемлекеттік ынталандыру шаралары туралы естіп, білді. Сарапшылар сол жиында шығындардың бір бөлігін өтеу мүмкіндіктері мен өтінім беру тәртібі туралы айтып, осы бағыттағы біраз жайттан хабардар еткен.

Кәсіпорын жобалаудан бастап, жабдықты тиісті жеріне жеткізіп беруге дейінгі өндірістің циклын толық атқарып отыр. Компанияның жұмыс жүйесі халықаралық стандарттарға сәйкес сапа менеджментіне негізделген.

Бүгінде 25 адам еңбек етіп жүрген кәсіпорын өнімнің 500-ден астам түрін шығарады. Жаңа цифрлық бағдарламалық басқару жүйесі бар термиялық кесу станогы еңбек өнімділігін айтарлықтай жақсартуға мүмкіндік берді.

Естеріңізге сала кетейік, өңдеу өнеркәсібіндегі (шағын және орта бизнес) кәсіпорындар өндірісті дамыту, технологиялық жабдықты сатып алу және өнімді ілгерілету мақсатында шығындарының бір бөлігін өтей алады. Осы жылдың алғашқы жеті айының қорытындысы бойынша QazIndustry отандық кәсіпорындардың 526,4 млн теңгеге шығындарын өтеген.

 Жасұлан БАҚЫТБЕКҰЛЫ