Баянауылдық робототехниктер халықаралық фестивальде үздік атанды

Қарағандыда «RoboLand-2025» робототехника, бағдарламалау және инновациялық технологиялардың X Халықаралық мерейтойлық фестивалі өтті. Оған Қазақстан облыстарынан, сондай-ақ Болгария, Иран, Ресей, Әзірбайжан, Өзбекстан және Қырғызстаннан 362 командадан тұратын 750 оқушы қатысты. Павлодар облысының намысын 16 команда қорғады.

Фестиваль 17 номинация бойынша өткізілді.

«Теңге алу» номинациясында Баянауыл ауданының Мәшһүр Жүсіп атындағы жалпы орта білім беретін мектебінің оқушылары – «JanaJol-1» командасының мүшелері Хамза Төлебай және Марал Нұрислам алтын медальдар мен бірінші дәрежелі дипломдардың иегерлері атанды.

«Қос теннис» номинациясы бойынша екінші дәрежелі күміс медальдар мен дипломдарды «Janajol-4» командасының мүшелері, Мәшһүр Жүсіп атындағы жалпы орта білім беретін мектебінің оқушылары Қасиет Баян және Ислам Қасиет алды.

«Садақ ату» номинациясы бойынша «JanaJol-2» командасы қола жүлдегер атанды. Оның құрамына баянауылдық оқушылар – Назымхан Ернар, Мұрат Нұрғиса кірді. «Үлкен саяхат» номинациясы бойынша үшінші орынды Баянауыл ауданының Ш.Шөкин атындағы №2 орта мектебінің оқушысы Бауыржан Камен иеленді.

Балаларды Данияр мен Асқар Аюпов атты педагогтар дайындады.