БЕРЕКЕЛІ ШАҢЫРАҚ
16 наурыз — Шаңырақ күніне орай, аудан әкімінің орынбасары Ерлан Ермағанбетов, аудандық ардагерлер кеңесінің төрағасы Серік Аппазов және аудан әкімдігінің ішкі саясат бөлімінің басшысы Ұлбике Сәлімова еңбек ардагері, Жаңатас қаласының тұрғыны үлгілі жанұя Садиевтердің шаңырағына барып, мерекемен құттықтап қайтты. Аудан әкімінің орынбасары Ерлан Дайрабайұлы еңбек ардагері Серік Садиевке ұзақ ғұмыр тілеп, шаңырақтан береке кетпесін деген ізгі тілегін айтты.
Әулеттің тірегі, қазыналы қария Серік Пәрдеұлы 1954 жылдың 24 қарашасында Түркістан облысы, Созақ ауданы, Құмкент ауылында дүниеге келген. Еңбек жолын 1970 жылы ауылында қарапайым жұмысшы болып бастайды. 1984 — 2000 жылдары кеншілер шаһары Жаңатас қаласындағы «Қаратаухимстрой» мекемесінде кейіннен «Қазфосфат» ЖШС-інде абыройлы қызмет атқарып, 2017 жылы зейнетке шығады.
Отбасында жұбайы Тұрсынкүл Тәжіқұлқызымен отандасқандарына 50 жыл болыпты. Тату отбасы 4 ұл өсіріп, ұлдарын ұяға қондырады. Бүгінде ұлдары әр салада жауапты қызметтерді атқарып келеді. Ұлдарынан 11 немере көріп отырған еңбек ардагері немерелерінің сүйікті атасы болып отыр. Шаңырақтарынан үнемі қонақ үзілмейтін берекелі жанұя бірліктің үлгісін көрсетіп келеді.