Данышпанның ақылы

Ол қанша тырбанса да жарлылықтан құтыла алмаған көрінеді. Әбден зығырданы қайнаған жігіт данышпаннан ақыл сұрай барыпты.

-Уа, тақсыр, сізге бір өтінішім бар еді. Жоқшылықтан әбден қажыдым, не әрекет етсем де бірім екі болмайды. Бұл қалай, не кеңес бересіз?

Данышпан оған үйленуге кеңес беріпті.

-Мұныңыз қалай, тақсыр, ішерге ас, киерге киім таба алмай жүргенде, үйлену менің немді алған?-деп безек қағады жігіт.

Данышпан оны егіндікке ертіп барып, пісіп тұрған бидайды оң қолымен ғана (сол қолын тигізбей) оруға бұйырады да:

-Орғаныңды бір жерге жия бер,-деп кетіп қалады. Сәлден соң қайтып келген данышпан:

-Өндіре алмапсың ғой, бұл қалай?-депті жігітке.

-Сыңар қолмен қиын екен, тақсыр.

-Ендеше, қос қолдап орып көрші.

Қос қолдап орған жігіт жұмысты өндіріп тастайды.

-Есіңде болсын, жігітім,-дейді данышпан, — оң қол ер, сол қол әйел. «Бас екеу болмай, мал екеу болмайды». Әйелің өзіңе сүйеніш, ақылшы, жәрдемші болса, кедейшіліктен де құтыласың,-деп кеңес берген екен.