ДОСЫҢДЫ ДҰРЫС ТАҢДАЙ БІЛ

Әбу Жағфар Мұхаммед бин Әли Бақир былай дейді:
Әкем маған: «Балам! Бес кісімен ешуақытта жолдас болма, олармен әңгімелеспе және жолда серік болма! — деді.
— Құрбаның болайын әке, ол бесеуі кім?,-деп едім, әкем:
— Пасықпен жолдас болма, ол бір асқа бола немесе одан да төменіне сені сатып жібереді,-деді.
— Әке! Одан да төмені не?
— Дәметіп, қолы жетпеген нәрсе.
— Әке! Екінші адам кім?
— Сараңмен жолдас болма. Өйткені, ол саған ең керек кезде мал-дүниесін бермейді.
— Әке! Үшіншісі кім?
— Өтірікшіні жолдас етпе, ол сағым сияқты жақынды сенен алыстатып, алысты саған жақын етіп көрсетеді.
— Әке, төртіншісі кім?
— Ақымақпен жолдас болма. Өйткені, ол саған пайда беремін деп зиян тигізеді.
— Әке, бесіншісі кім?- дегенімде:
— Туысқанымен ара-қатынасын үзгенмен жолдас болма, өйткені ондай адамның Құранда үш орында лағынеттелгенін көрдім»,-деп әкем өсиет еткен еді.
P.S. Дос — араб тілінде «садық», яғни, шыншыл деген сөзден туындайды. Демек, дос – әр жағдайда сізбен шыншыл, қарым-қатынастағы бауырыңыз.
Нағыз дос сол адам, сен оны көргенде есіңе Алла-Тағала түседі, оған шын сенім арта аласың, ол ешқашан жалған сөйлемейді, әрдайым саған көмекке қолын созады, қайғыңды бөліседі, қуанышыңды арттырады, барын алдыңа тосады, сен үшін жанын қиюға да дайын болады.