«Ертіс Медиа» ЖШС көк түсті Жеңіс лентасын тарату акциясын бастады

Павлодарда «Ертіс Медиа» ЖШС Ұлы Жеңіс күні қарсаңында көк түсті ленталарды тегін тарату акциясын кезекті рет қолға алды.

Айта кетейік, мұндай акция Павлодар өңірінде екінші жыл қатарынан ұйымдастырылып отыр. Өткен жылы агенттік серіктестік құрамындағы облыстық «Сарыарқа самалы», «Регион.kz» газеттері мен «Pavlodarnews» ақпараттық агенттігінің тілшілері аталмыш акцияны бастап, жергілікті БАҚ өкілдеріне жолдаған болатын. Биылғы эстафетаны ұйымдастырушылар «Жас Отан» жастар қанатының облыстық филиалы мен «Жасыл ел» штабына жолдады.

— Ең бірінші кезекте бұл өскелең ұрпақты патриоттыққа тәрбиелейтін шара, — дейді «Ертіс Медиа» ЖШС директорының орынбасары Жұмабек Сманов.

– Ұлы Отан соғысында жан тапсырып, бейбіт өмірді аңсаған әр батырымыздың алдында бас иеміз. Жыл өткен сайын олардың есімі ардақтала береді. Эстафетаны әріптестеріміз қуана-қуана жалғастырады деген ойдамын. Барша отандастарымды мерейлі мерекемен құттықтаймын.

Өз тілшіміз.