«ҚАРАСОРА-2024» АРНАЙЫ ПРОФИЛАКТИКАЛЫҚ ІС-ШАРАСЫ ӨТТІ
Өткен аптада аудан әкімінің міндетін атқарушы Ержан Әмірхановтың төрағалығымен аудан әкімдігі жанындағы құқық бұзушылық профилактикасы жөніндегі ведомствоаралық комиссиясының кезекті отырысы өткен болатын. Осы отырыстың қорытындысы бойынша аудан көлеміндегі жабайы қарасора есірткілік өсімдігінің ошақтарын жою туралы шешім қабылданды.
Осы орайда есірткі қылмысына қарсы күрес және оның таралуына жол бермеу мақсатында, аудан әкімдігі мүдделі органдармен жұмысшы топ құрып, Республикалық «Қарасора-2024» жедел профилактикалық іс-шарасын ұйымдастырды. Жұмыс тобы нашақорлық пен есірткі қылмысына қарсы іс-қимыл іс-шараларын тиісті деңгейде жүргізу үшін, «Ураган форте» арнайы гербицидке қажетті қаражат қарастырып, техникалармен жасақтады.
Атап айтқанда аудандық ветеринария бөлімінің дәрі шашатын «Газ» автокөлігі мен осы мекеменің ветеринар дәрігерлері қарасора өскен аумақты автокөлікпен таптай жүріп арнайы дайындалған қоспаны шашып шықты. Нәтижесінде, 52 гектар қара сора ошағы дәріленіп, жойылды.
Аталған шараға аудан әкімінің міндетін атқарушы Ержан Әмірханов, аудан прокурорының орынбасары Нұрлан Ахаев, ҚР ҰҚК-нің Жамбыл облысы бойынша департаментінің Мойынқұм аудандық бөлімшесінің қызметкері Диас Дәулетбай, аудан әкімі аппаратының мемлекеттік-құқықтық бөлімшесінің басшысы Құралай Ізбасарова мен бас маманы Қарлығаш Смақ, аудандық полиция бөлімінің криминалдық полиция бөлімшесінің бастығы Ернұр Тоғаев, аудан әкімдігінің жер қатынастары бөлімінің басшысы Эльдар Кокушев, аудандық ветеринариялық бөлім директоры Ернұр Нәдірғожин, ветеринариялық бөлім қызметкерлері, Мойынқұм ормандарды және жануарлар дүниесін қорғау мекемесінің қызметкерлері Қожабек Ақбергенов, Берікбай Серікбаев, Қосқұдық ормандарды және жануарлар дүниесін қорғау мекемесінің инженері Берік Абрешов пен осы мекеменің орманшы қорықшысы Медет Әбдіқалықов пен БАҚ өкілі белсенді қатысты.
Осы іс-шараға бақылау жүргізген аудан прокурорының орынбасары Нұрлан Ахаев атқарылған жұмыстар жайында баяндады.
— Арнайы құқық қорғау және атқарушы органдармен бірлесе «Есірткісіз болашақ» жобасы аясында аудан аумағында өскен жабайы қарасораны жою жұмыстары жүргізілуде. Оған жергілікті бюджеттен қаражат бөлініп, арнайы гербицидтерді шашу арқылы жою тәсілі қолданылуда. Аталған жұмыстар есірткі қылмыстарының алдын алуға оң әсерін келтіріп, алдағы уақытта тұрақты түрде жүргізілетін болады, -деді аудан прокурорының орынбасары.
Алдын алу іс-шараларының бірден-бір жолы, ол жабайы өсетін қарасора өсімдігін дәрілеу арқылы жою жұмыстары болып табылады. Іс-шарадан күтілетін нәтиже есірткі қылмыстарының алдын алу, оларды ашу, жолын кесу болып табылады.
Елдос ЕРҒАБЫЛҰЛЫ,
«Мойынқұм таңы».