Қазақстанның үздік тауарлары

Өңірімізде өндірілетін сапалы өнімдер көп емес. Алайда, халық олардың саны емес, сапасына мән береді. Тұтынушыларға бағалы өнімдерін ұсынып жүрген «ТаразКожОбувь» жауапкершілігі шектеулі серіктестігі елімізге белгілі. Бұл кәсіпорын бүгінге дейін аяқ киім және тері өндірісін өндіруде.

Елімізде жылда осындай сапалы өнімдерді сынға алатын Қазақстан Республикасы Президентінің «Алтын сапа» сыйлығын алу байқауы ұйымдастырылады. Сонымен бірге «Қазақстанның үздік тауары» республикалық көрмесі де өткізіледі. Биыл сол көрмеге аталмыш кәсіпорын өнімдерін ұсынып, тауарлары сапалы деп танылып, Мемлекет басшысы Қасым-Жомарт Кемелұлы Тоқаевтың «Қазақстанның үздік тауары» дипломымен марапатталды.

Өндіріс орнының бас директоры Еркін Абдібаевтың айтуынша, серіктестік 1961 жылдан бері жұмыс атқарып келеді. Кәсіпорынның өндірістік қауқары жылына 500 мың жұп аяқ киімді құрайды.

– Қазіргі таңда 248 адамды жұмыспен қамтып отырмыз. Бұл тек қана аяқ киім өндірісі бойынша. Қосымша бізде тері өндіретін зауыт бар. Тауарларымызды халыққа саудалайтын облыста 10 дүкен жұмыс жасайды. Қазақстанның кез келген жеріне жеткізіп береміз. «Қазпочта» акционерлік қоғамымен келісімшартқа отырғанбыз. Өнімге тұтынушылар көп, – дейді бас директор.

Серіктестік Қазақстандағы былғары аяқ киім шығаратын ірі отандық өндіруші орын. Кәсіпорын құқық қорғау органдарына арналған аяқ киім, жұмыс және күнделікті аяқ киімдер шығаруға маманданған. Аяқ киімнің ассортименті 80-нен астам модельді құрайды. Өткен жылы дайын өнім шығару 170 584 жұпты құрап, бұл алдыңғы жылмен салыстырғанда 38 пайызға жоғарылаған. Есепті жылы сату көлемі 162171 жұп аяқ киімді құрап, өндіріс ошағы 1 миллиард 710 миллион теңге табыс тапқан.

Серіктестіктің ерекшелігі – өндірісті кез келген тапсырыс берушінің талғамына қарай бейімдеу. Ол үшін барлық зауыттың қажетті техникалық және шикізат базасы жасақталған. Аяқ киім фабрикасы брезентті жұмыс аяқ киімін шығаратын цехтардан, хромнан жасалған ерлер аяқ киімін тігетін аяқ киім шеберханасынан, аяқ киім шығаруға дайындық цехтарынан тұрады. Австрия, Чехия және Италияда жасалған заманауи технологиялық жабдықтармен жабдықталған. Аяқ киім фабрикасы армияға, құқық қорғау органдарына, күзет және құтқару қызметтеріне, әртүрлі өндірістік және өндірістік кәсіпорындардың жұмысшыларына арналған тырнақты және инъекциялық әдіспен бекіту аяқ киімін шығарылуда.

Алпыс жылдық тарихы бар зауытта кеңес одағы тұсында 6 миллион пар аяқ киім шығарылса, өткен жылы фабрикада 170 мыңнан аса пар аяқ киім тігілді. Сонымен қатар, серіктестік салықтық міндеттемелерін де талапқа сай орындауда.

Нұржан ӘЛІШ