Көктемгі дала жұмыстары басталды

Бүгін аудан әкімі аталған шаруашылықта болып, ондағы көктемгі дала жұмыстарының барысымен танысты. «Агрохолдинг-Аспан» ауыл шаруашылығы кооперативінің басшысы Саха Манатов шаруашылықта атқарылып жатқан істерді кеңінен таныстырды.

Сонымен қатар, Диқан ауылдық округі Шымырбай учаскесіндегі «Агрохолдинг-Аспан» ауыл шаруашылығы кооперативінің егілетін қант қызылшасы алқабына фосфогипс енгізу жұмыстарын көріп, 100 гектар күздік бидай алқабын аралады. Түймекент ауылдық округіндегі аталған кооперативтің 200 гектар дәндік жүгері егілетін алқапты дайындау және 40 гектар көпжылдық шөп (жаңа жоңышқа) егу жұмыстарын көрді.

Суханбаев ауылдық округіндегі «Жақсылық» шаруа қожалығының уақ мал төлдету жұмыстарымен танысумен қорытындыланды. Қожалық жетекшісі Ұ.Сапаралиева бүгінде мал төлдету жұмыстары толық аяқталғанын жеткізді. Шаруашылықта мыңнан астам уақ мал болса, оның жартысына жуығы асыл тұқымды. Яғни, шаруа иесі соңғы уақытта қолдағы бар малдарды асылдандыру жұмыстарын жүйелі түрде қолға алған. Қожалықта үш адам тұрақты жұмыспен қамтылып, оларға барлық жағдай жасалынған.

Айта кетейік, аудан әкімдігінің ауыл шаруашылығы бөлімінің мәліметі бойынша, аудан бойынша үстіміздегі жылы жалпы 56 493 гектар ауыл шаруашылығы тауарын өндірушілердің (АШТӨ) егістік алқабын игеру және көктемгі егіс-дала науқанына 868 дана әртүрлі техника қатысады деп жоспарлануда.