«Қыдыр дарысын»
Қазақы түсінігімізде Қыдыр ата, жақсылық таратушы, қиналғанға көмектесіп, береке тасушы секілді ұғым бар. Сондықтан бата бергенде «Қыдыр дарысын», «Қыдыр қолдасын» деп айтып жатады.
Бүгін Ынтымақ күнінде Орталық алаңда өткен мерекеде түйені ерттеген Қыдыр ата сахналанды. Алыстан ақ сақалы бұлттай, ақ таяғы құрықтай, ақ шапаны жайнаған, шалғайдан көзді арбаған, екінің бірінің көзіне түсе бермейтін, бір жерге екі келмейтін, ел аралап батасын беретін Қыдыр атаны көрермендер ыстық ықыласпен қарсы алды.
Халқымызда «Қыдыр көрсең бата ал» дегендей, Ұлыстың Ұлы күнінде Қыдыр ата елге: — Сұрасаң бата берейін,Жақсылықты терейін.
Жаңа жылда жарандар,
Үстем болсын мерейің!
Келген наурыз құт болсын,
Берері елге нық болсын!
Ұлыстың ұлы күнінде,
Ұлың оңға қонсын,
Қызың қырға қонсын,
Қыруар малың өріске толсын.
Дәулетіңді асырсын,
Дұшпаның ығып басылсын.
Наурыз елге сәулет берсін,
Көп қайырлы дәулет берсін! — деп батасын берді. Жиылған жұрт Қыдыр атаның ақ батасына «Әумин» десті.