МЕМЛЕКЕТ КӘСІПКЕРЛЕРГЕ ТАҒЫ БІР МҮМКІНДІК ТУҒЫЗДЫ
2018 жылы еліміздің Тұңғыш Президенті Бес әлеуметтік бастамасын жариялаған болатын, солардың бірі студент жастардың өмір сүру жағдайларын жақсартуға бағытталған. Осы міндетке қол жеткізу үшін жекеменшік сектордың ауқымды қатысуын көздейтін мемлекеттік тапсырысты орналастыру тетігі әзірленген.
Бұл туралы ӨКҚ баспасөз алаңында «Қаржы орталығы» АҚ өкілі Рауан Сисенов айтып берді. Орталық инвесторларды, жеке кәсіпкерлерді мемлекеттің қаржылық қолдауымен студенттік жатақханалар құрылысына қаржы салуға шақырады. Сонымен қатар, бұл процеске кезекті әлеуметтік объектіні тұрғызу ретінде емес, табысты, тұрақты және келешегі мол бизнес-жоба ретінде әлдеқайда ауқымды қарауды ұсынған. Әрі осылай айтуға барлық алғышарттар бар көрінеді.
«Біріншіден, бұл – жоғары сұраныстың болуы. Бүгінгі таңда елімізде студенттер тұру үшін 63 мыңнан астам орын-жай жасау қажет. Бұл мегаполистерден бастап облыстық маңызы бар қалаларға дейінгі еліміздің барлық өңірлеріне тән қажеттілік. Оның үстіне, жақын болашақта Қазақстанды 2000-шы жылдарда болған baby-boom-ның салдары күтіп тұр, сондықтан студенттер контингенті де өсетін болады. Әлбетте, бұл жағдай студенттік жатақханаларға деген сұраныстың артуына әсер етпей қоймасы анық», — деді ол.
Рауан Құрметұлы тетіктің тұжырымдамасы мемлекет пен жекеменшік сектордың әріптестігіне негізделетінін де атап өтті. Инвестор, оқу орны не кәсіпкер тұлғасындағы жеке құрылыс салушы өз қаражаты есебінен объектіні іске қосуды жүзеге асырады. Объекті сәтті пайдалануға енгізілген жағдайда мемлекет онда мақсатты мемлекеттік тапсырысты орналастырады.
«Қаржы орталығы» АҚ-ның тағы бір өкілі Қайсар Төлепбаев осы мақсаттар үшін республикалық бюджетте 152 млрд. теңге көзделгенін және ең маңыздысы, бұл қаражат секвестрлеуге жатпайтынын әңгімеледі. Мемлекеттен төлемдер мерзімі аяқталғаннан кейін объект құрылыс салушының меншігінде қалады екен. Жалғыз шарт 20 жылға объектінің нысаналы мақсатын өзгертуге ауыртпалықты тіркеу болмақ.«Іске асырылып жатқан жобалар аясында мемлекеттік тапсырысты орналастырумен қатар, қосымша табыс көздері болады. Өйткені, студенттердің ай сайынғы тұру ақысы мемлекеттік тапсырыстың құнына кірмейді. Оның мөлшерін жатақхана иесі реттейді және нақты өңірдегі тұрғын үй нарығының жағдайымен анықталады. Сондай-ақ тұрмыстық қызмет көрсету үшін коммерциялық алаңдар (асхана, шаштараз, жаттығу залы және т.б.) жасауға болады, олардың негізгі тұтынушылары тұрғындар», — деп түсіндірді ол.
Өңірлік коммуникациялар қызметі