МЕНІҢ АУЫЛЫМ – ҚАЗАҚСТАННЫҢ БІР БӨЛШЕГІ

Ауыл – алтын тамыр. Өткен аптада Жамбыл ауданындағы Қызылқайнар ауылдық округінің ауылдық клубы мен Гродиково ауылдық округінің мәдениет үйінде «Менің ауылым – Қазақстанның бір бөлшегі» атты этносаралық бірлік кездесуі өтті. Шараға спикер ретінде облыстық «Знамя Труда» газетінің тілшісі, тіл жанашыры Диана Қалманбай мен облыстық «AR-AI» газетінің тілшісі Арай Болатқызы арнайы шақырылыпты. Мен де осы өзекті мәселелер көтерілген жиынның куәсі болдым. Ендігі ретте көргенімді мойынқұмдықтармен бөлісіп отырмын.

«Тілдік және этникалық белгілері бойынша ар-намыс пен қадір-қасиетті қорлаудың кез келген нысандарына жол бермеу» жобасының аясында өткізілген кездесуге қариялар, ақ жаулықты аналар мен жастар қауымы қатысып, өнегелі әңгімемен сусындады.

Алғашқы спикер елімізде этносаралық өшпенділік тілін жеңуге арналған этика кодексі туралы баяндады.

– Бүгінгі таңда Қазақстан бейбітшілік пен келісімнің қазақстандық үлгісін әлемге танытушы елге айналып отыр. Әрбір қазақстандық азамат үшін ұрпақтар сабақтастығы арқылы тарихи қалыптасқан татулық, сенім мен тең құқықтылық ең маңызды қасиет. Елімізде этносаралық өшпенділік тілін жеңуге арналған этика кодексі бар. Өшпенділік тілі – нақты бір адамға емес, ортақ белгілері бар адамдар тобына қарата айтылған өшпенді ой-пікір, көзқарас, мәлімдеме. Ол сөз, кескін немесе басқа да контент түрінде болуы мүмкін. Өшпенділік тілі қандай да бір топтың дініне, ұлтына, азаматтығына, тұрғылықты жеріне, өзгеше көзқарасына және тағы басқа белгілеріне қатысты болады. Ең жиі кездесетіні – этникалық (ұлттық) белгілерге байланысты өшпенділік тілі. Өшпенділікті, араздықты әртүрлі тәсілмен көрсетуге болады. Сондықтан да тұтастай бір ұлтты қорлайтын әзіл-қалжыңнан бастап, қырып-жоюға, өлтіруге шақыратын, үгіттейтін сөздерге дейін өшпенділік тіліне жатады, – деп, тұтас этникалық топ туралы теріс пікір қалыптастыруға, әр сөзімізге абай болуымызға шақырды.

Ал екінші спикер Диана Қалманбай ауылдардың Қазақстан үшін маңызы туралы сөз қозғады.

– Тумасынан таза, арамдықтан ада, қиянаттан шет, ешкімді жатсынбайтын, бөліп-жармайтын, барлығын туғанындай санайтын халықтың бірі – қазақ халқы. Бүгінде осы құндылықтардың барлығы атадан балаға беріліп отыр. Әсіресе, ауыл жұрты мұндай тәрбиеге аса қатты мән береді. Жамбыл ауданында бүгінгі таңда 87638 адам өмір сүреді. Оның 70 пайызы қазақтар болса, қалған бөлігі – өзге этнос өкілдері. Биыл ауданға да 95 жыл толып отыр. Осы уақыт аралығында сіздер бейбітшілікте, татулықта өмір сүріп келесіздер. Аудан да көркейіп, дамуда. Мемлекет басшысының бастамасымен жаңа бағдарламалар ауылдарға енуде, халық шарапатын көріп отыр. Сондықтан «Менің ауылым – Қазақстанның бір бөлшегі» деген бүгінгі кездесудің тақырыбы ұтымды қойылған, — деді спикер.

Кездесу барысында ауылдың жай-күйімен таныстық. Ауылшаруашылығының мамандары өз кәсіптерінің қыр-сырын ашып, мемлекеттік бағдарламалардың тиімділігі жайлы сөз қозғады. Ал қонақтар арасында өздерінің бизнесін ашқысы келетін жастар да бар екен. Сондай-ақ, еркін форматта өткен жиында этносаралық татулық және өзге де қоғамдық бірлестіктердің, этносаралық коммуникацияның тиімді құралдарын қалыптастыруға жаңа серпін берумен қатар, мемлекеттік тілді құрметтеп, қоғамдағы рөлін арттыру, жастарға патриоттық бағыттағы тәрбие беру мәселесі көтерілді.

Өз кезегінде ауыл тұрғындары спикерлерге сұрақтар қойып, ізгі тілектерімен бөлісті.

Ұлжан ПІРІМҚҰЛОВА,

аудандық білім бөлімінің «Экологиялық орталық» қосымша білім беру мекемесінің әдіскері.