Мың айдан да қайырлы түннің қадірін білейік!

Сағындырған Рамазан айының да мұсылмандармен қош айтысар сәті жақындап келеді. Барша мұсылман соңғы он түннің біріне жасырылған Қадір түнінің қайырынан мақрұм қалудан қорқып, сол түндерде ізгі амалдарды көптеп жасауға тырысары хақ. Адамзаттың ардақтысы Мұхаммед (с.а.у)-нің хадистерінің бірінде Рамазанның 27-ші түні Қадір кешіне сәйкес келетіні айтылған. Осыны негізге алып дәл бүгінгі түнді, яғни, айлардың сұлтаны Рамазанның 27-ші түнін күллі мұсылман халқы ерекше өткізеді. Шамасы келгендер таңға дейін ұйықтамастан құлшылық етсе, енді бірі мешітте жамағатпен бірге болады, әйтеуір, әркім қысқа уақытта қолынан келген құлшылығын жасап қалуға тырысып бағады.

Бұл түнде не істеу керек деген сұрақтың тоқтаған кезі болған емес. Өйткені, дін исламға деген көзқарасы түзеліп, құлшылыққа ниеттеніп жүргендер күн санап көбейіп келеді. Кезінде дастарханды гүл жайнатып қойып «Қадыр ата»  немесе «Қыдыр атаны» күтетін қазақ бүгін жоқ. Аллаға шүкір деп айтайық, ондай түсініктен арылуымызға мұсылмандардың бір-біріне жасаған дұғасы себепкер болған да шығар. Намазы бар, жоқ, ораза ұстаған, ұстамаған деп бөлмей, бір-біріне мейіріммен қараған мұсылмандардың ниетінің өзі берекелі болары сөзсіз. Сондықтан, 83 жыл төрт айдан қайырлы, берекелі болған түнде жүрегімізбен, кейін шамамыз жеткенше тәнімізбен құлшылық жасайық. Мұзылмандардың, халқымыздың бірлігін, Жер бетіндегі адамзаттың тыныштығын Жаббар Иемізден жалбарына сұрайық. Тіпті, дұға білмей жатсаңыз, Жаратушы Алла Тағаладан кешірім тілеудің өзі көп тілектің қабыл болуына сеп болатынын естен шығармаңыз. Өйткені, бізге дейінгі қауымдардың Алланың қаһарына ұшырауының басты себебі – әлемдердің Раббысынан кешірім сұрап, тәубе етілместен күнәлардың күрт көбеюі болатын. Қай заманда болмасын күнәлар болған, болады да. Ал, осыншама күнәлардың себебінен Алланың ашуын қайтарып отырған қандай күш деп ойлайсыз? Ол әрине, Алла Тағала өзі Құранда баяндағандай Оның Мейірімі Қаһарынан, Рақымы азабынан күштірек және пенделердің уақытында тәубеге келуі, жалынып-жалбарынуы.

Құлшылықтың мәйегі – дұға десек, назарларыңызға Қадір түнінде оқуға лайықталған дұғалардың тізбегін ұсынбақпыз.

Ата-ана үшін жасалатын дұға

«Раббым, Мені кішкентайымнан бағып, тәрбиелеп өсіргеніңдей оларға мейірім ет!»

«Роб-бир-хәм-һу-мәә-кә-мәә роб-бә-иәә-нии со-ғии-роо»

Жоқшылықтан, ауру-сырқаудан сыйыну

Я, Алла! Тәніме саулық бер! Уа, Алла! Естуіме саулық бер! Уа, Алла! Жанарыма саулық бер! Сенен басқа ешбір құдай жоқ. Уа, Алла! Мен күпірлік пен жоқшылықтан Өзіңе сыйынып, пана сұраймын. Сондай-ақ қабір азабынан Өзіңе сыйынып, пана сұраймын. Сенен басқа ешбір Құдай жоқ.

«Аллаһумма ъафини фи бәдәни, Аллаһум- мә ъафини фи сәмъи, Аллаһумма ъафини фи бәсари, лә иләһә иллә әнт. Аллаһумма инни әъузу бикә минәл-куфри уәл-фәқри, уә әъузу бикә мин ъазәбил-қабри, лә иләһә иллә әнт».

Жақсы мінез сұрау

Я, Алла! Мені өмірдің қиындығынан сақтай гөр. Мені ең жақсы істер мен жақсы мінезге жетелей гөр. Өйткені оның ең жақсысына Сенен басқа ешкім жетелей алмайды. Және оның жаманын менен айықтырғайсың. Өйткені оның жаманынан мені Сенен басқа ешкім де айықтыра алмайды.

«Аллаһумма инни әъузу бикә мин ән ураддә илә әрзәлил-ъумр. Аллаһуммаһ-дини әхсәнәл-әъмәли, уәл-әхләқи лә йәһди ли-әхсәниһә иллә әнтә уәсриф ъанни сәий-әһә лә йәсрифу ъаннисәий-әһә иллә әнт».

Ризық сұрау

Я, Алла! Көбейте гөр, кемітпе, сыйлы қыл да, бейшара қылма, бере гөр де, тыя көрме, бізді таңда да, құр қалдырма. Уа, Алла! Барлық істерімнің соңын жақсарт. Дүние қорлығынан және ақырет азабынан құтқар.

«Аллаһумма зиднә уә лә тәнқуснә, уә әкримнә уә лә туһиннә, уә аътыйнә уә лә тәхримнә, уә әсирнә уә лә ту-әссир ъаләйнә. Аллаһумма әхсин ъақибәтәнә фил-умури куллиһә, уә әжирнә мин хизид-дуния уә ъазәбил-әхира».

Жақсылық сұрау

Я, Алла! Жақсылықтың бастауы мен соңын, әуелгісі мен ақырғысын, әшкересі мен жасырынын, Жәннаттағы биік дәрежелерді сұраймын. Менің зікірімді жоғарылатып, ауыртпалығымды таста, жүрегімді тазалап, әурет жерімді сақта және күнәларымды кешір.

«Аллаһумма инни әс-әлукә фәуәтихәл-хайри уә хауәтимәһу уә жауәмиъәһу, уә әууәләһу уә әхираһу уә заһираһу уә бәтыйнәһу, уәддәражәтил-ъулә минәл-жәннәһ. Аллаһумма инни әс-әлукә ән тарфәъә зикри, уә тәдаъа уизри, уә тутаһһира қалби, уә тухассинә фаржи, уә тәғфира ли зәнби».

Алладан Өзін жақсы көретін жүрек, иман сұрау

Я, Алла! Өзіңді жақсы көруді және Сені жақсы көретінді жақсы көруді және Сенің жақсы көруіңе жақындататын әрбір амалды жақсы көруді маған нәсіп ет. Уа, Алла! Сенен мәселенің қайырлысын, жақсы дұға, жақсы нәтиже және жақсы сауап сұраймын. Мені бекем ет және таразымды ауырлат, иманымды нығайт, дәрежемді көтер, намазымды және ғибадаттарымды қабыл ет, қатемді кешір және маған жоғары дәрежелі Жәннатты нәсіп ет!

«Аллаһумма инни әс-әлукә хуббәкә уә хуббә мән йухиббукә, уә хуббә куллә ъамә лин йуқаррибуни илә хуббик. Аллаһумма инни әс- әлукә хайрал-мәс-әләти, уә хайрад-дуъа-и уә хайран-нәжәхи, уә хайрас-сәуәби, уә сәббитни уә сәққил мауазини, уә хаққиқ имәни, уәрфаъ дәражәти, уә тәқаббәл саләти уә ъибәдәти, уәғфир хати-әти уә әс-әлукәд-дәражәтил-ъулә минәл-жәннәһ».

Береке сұрау

Я, Алла! Менің естуімді, көруімді, мінезімді, сырт келбетімді, отбасымды, өмірімді және амалымды берекелі етуіңді сұраймын, ізгі амалдарымды қабыл еткейсің. Сенен Жәннаттағы биік дәрежені сұраймын.

«Аллаһумма инни әс-әлукә ән тубәрикә фи сәмъи, уә фи бәсари, уә фи халқи, уә фи хулуқи, уә фи әһли, уә фи махйа-я, уә фи ъамәли, уә тәқаббәл хәсәнәти, уә әс-әлукәд- даражәтил-ъулә минәл-жәннәһ».

Алланың разылығын сұрау

Я, Алла! Шынайы иман, иманды көркем мінез, артынан бақыт ілескен табыс, Сенен келетін мейірім және жарылқау, кешірім және разылығыңды сұраймын.

«Аллаһумма инни әс-әлукә сиххатән фи имәни, уә имәнән фи хусни хулуқин, уә нәжәхән йәтбәъуһу фәләхун, рахмәтән минкә уә ъафиәтән минкә, уә мәғфиратән уә ридуәнә».

Алладан көмек сұрау

Я, Алла! Істерімнің қорғаушысы болған дінімді, өмір сүретін дүниемді, қайтып оралатын ақыретімді түзегейсің. Өмірімді ізгі амалдарды көбейту, ал өлімімді барлық жамандықтан демалу қылғайсың. Уа, Раббым! Маған көмектесе гөр және маған қарсы көмектеспегейсің. Мені жеңіске жеткіз және біреуге жығып берме. Мені тура жолға сал және тура жолды маған жеңіл қылғайсың.

«Аллаһумма әслих ли динил-ләзи һууә ъисмәту әмри, уә әслих ли дуния-ялләти фиһә мәъәши, уә әслих ли әхиратил-ләти иләйһә мәъади, уәжъалил-хәятә зиядатән ли фи кулли хайрин, уәжъалил-мәутә рахатән ли мин кулли шәрр. Уә Рабби әъинни уә лә туъин ъаләйя уәнсурни уә лә тәнсур ъаләйя, уәһдини уә йәссирил-һудә ли».

Алла Елшісінің (оған Алланың игілігі мен сәлемі болсын) былай деп айтқаны жеткізілген: «Раббысының пендеге ең жақын болатын уақыты түннің соңғы бөлігі (мұнда түннiң соңғы үштен бiр бөлігі туралы сөз болуда). Сол сәтте Алланы зікір етушілерден бола алсаң, солардан бол!», «Пенденің Раббысына ең жақын болатын уақыты сәждеге бас қойған кезі. Осы уақытта Аллаға көп дұға етіңіздер». Яғни, дұғаларды түннің соңғы бөлігінде және сәждеде жасауға тырысайық!

Алла Тағала Өзінің разылығы үшін жасайтын құлшылықтарымызды, Өзінен ғана тілейтін дұғамызды, ізгі амалдарымызды, Пайғамбар (с.а.у)-ға айтқан салауаттарымызды, ең бастысы осылардың баршасына деген ниет-ықыласымызды қабыл етсін! Әмин!

«ЕлАна» қоғамдық-танымдық сайты