Н. Нұржігітов: Халыққа статистикалық көрсеткіштер емес, нақты жұмыстардың нәтижесі керек

Жамбыл облысының әкімі Нұржан Нұржігітовтің төралығымен өткен кеңесте балық шаруашылығын дамыту, күл-қоқысты жинақтау, сұрыптау және өңдеу мәселелері талқыланды.
Табиғи ресурстар және табиғат пайдалануды реттеу басқармасы басшысының орынбасары Айбар Әділбақов күн тәртібіндегі алғашқы мәселе бойынша баяндама жасап, атқарылған жұмыстарға тоқталды.
Оның айтуынша, қазіргі таңда облыс аумағында 142 жергілікті маңызы бар балық шаруашылығы су айдындары және республикалық маңызы бар Балқаш көлінің 18 учаскесі бар. Бүгінгі күнде 78 жергілікті маңызы бар балық шаруашылығы су айдындары 69 табиғат пайдаланушыларға бекітіліп берілген.
Дегенмен, 64 балық шаруашылығы су айдындары әлі күнге бос тұр. Бұлар жыл соңына дейін Шу-Талас облысаралық балық шаруашылығы инспекциясымен бірлесіп бекітіліп берілетін болады.
Бүгінгі күні Инспекция 7 балық шаруашылығы су айдынын бекітіп беру бойынша аукцион өткізуде.
Жамбыл облысының балық шаруашылығын дамыту өңірлік бағдарламасы сәйкес облыста 2025 жылы тауарлы балық аулау көлемін 3000 тоннаға, 2030 жылы 8000 тоннаға жеткізу көзделген.
Ал, ағымдағы жылы облысымыздың аумағындағы су айдындарында 464,3 тонна тауарлы балық өндіру жоспарланып отыр.

— Біз мұндай қарқынмен көзделген нәтижеге жете алмаймыз. Кәсіпкерлер мен шаруа қожалықтарының атқарған жұмыстарын айтып отырсыздар? Салалық басқарманың, Шу-Талас облысаралық бассейндік балық шаруашылығы инспекциясының ұстанымы, көзқарасын көрінбейді. 64 су айдыны жыл соңына дейін бекітіліп береді дегенге де сену қиын.
Жол картасының орындалуы бойынша талдау жүргізілмеген. Субсидияның игерілуі де көңіл көншітпейді. Нақты жоспар, ұсыныс жоқ,-деді Нұржан Нұржігітов.
Басқосуда аймақ басшысы күн тәртібіндегі екінші мәселе ретінде қаралған қоқыстарды шығару, өндеу жұмыстарын да сынға алды.
Аталған басқарманың мәліментінше, бүгінгі таңда облыста барлығы 163 полигон және қоқыс төгуге арналған үйінділер жұмыс істеуде. Қалдықтарды жинау, тасымалдау және сұрыптау қызметтерімен айналысатын 43 мекемелер жұмыс жасауда. Олар 191 арнайы техникамен қамтылған.
Алайда, ағымдағы жылдың маусым айында ғарыштық мониторинг нәтижелері бойынша облыс аумағында 48 стихиялық қоқыс орны анықталған десек, олардың барлығы күнде толығымен жойылған. Солай бола тұра, осы жылы 27 шілдеде тағы қосымша 35 кездейсоқ орын анықталып, ол үйінділерді жою кестесі бекітіліп аудандарға жіберіліпті.
— Кездейсоқ қоқыс орындарын жою, болдырмау – басты талап. Ол үшін тұрғындар арасында жан-жақты түсіндіру жұмыстарын жүргізу қажет. Бұл тұрғыда жүйелі жұмыс болса, мұндай келеңсіздіктерге жол берілмейді.
Статистикалық көрсеткіштерге негізделген баяндаманы оқып берудің қажеті жоқ. Халыққа нақты атқарылып жатқан жұмыстардың нәтижесі керек.
Мәселелердің бар екенін ашық айту керек. Ал оларды шешу бойынша қандай шаралар қабылданып жатыр? Арнайы алгоритм, іс-шаралар жоспары, белгіленген индикатор бар, оның орындалуы қай деңгейде? Жұмыстың негізгі бағыты осы болу керек,-деді облыс әкімі.
Екі мәселе бойынша да атқарылып жатқан жұмыстарға қанағаттанбаған Нұржан Нұржігітов бұл тақырыптардың бір аптадан соң қайта қаралатынын баса айтты. Балық өнімінің көлемін арттыруға үлкен септігін тигізетін болады.

Жамбыл облысы әкімдігі