«НҰРЛАН БАЛҒЫНБАЕВ» КІТАБЫНЫҢ ТҰСАУКЕСЕРІ ӨТТІ
Жаңаөзен қаласындағы «ӨзенМұнайГаз» АҚ ғимаратында ардагер-мұнайшы Меңдеш Салиховтың «Нұрлан Балғымбаев» атты кітабының тұсаукесері өтті.
Аталған шараға «ӨзенМұнайГаз» АҚ директор Бекзат Абайылданов, Жаңаөзен қаласының құрметті азаматы, геолог, ардагер-мұнайшы Аманжан Өтесінов, ардагер –мұнайшы Тыныштық Базарбаев, «Хазармұнай» ЖШС директоры Нұржан Жұмағұлов, мұнайшы Майлыбай Өтебаев, Жаңөзен қалалық ардагерлер кеңесінің төрағасы Қуандық Бекмағанбетов, ақсақал Батырғали Құбашев, «ӨзенМұнайГаз» АҚ директорының орынбасары Мақсат Ибағаров, Жаңөзен қалалық-қоғамдық кеңесінің төрағасы Мұса Құлжабеков, қалалық ішкі саясат бөлімінің басшысы Дәмелі Есенова, Оразмағанбет Тұрмағанбетұлы атындағы Жаңаөзен мұнай-газ колледжінің директоры Таңат Өскімбаев, қалалық орталық кітапхана әдіскері Гүлжан Мадиярова, жергілікті БАҚ өкілдері, компания басшылары, қала белсенділері, мұнайшы-жастар қатысты.
Алғашқы сөз кезегінде «ӨзенМұнайгаз»АҚ директоры Бекзат Абайылданов Нұрлан Өтепұлының өмірі мен қызметі, егемендік алып, тәуелсіз болған мемлекеттің қиын да күрделі қалыптасу кезінде атқарған қызметтері мен нарықтық экономикалық қатынас кезінде еліміздің дамуына үлес қосқан еңбегі туралы әңгімеледі.
Шара барысында ардагер-мұнайшы Аманжан Өтесінов, Тыныштық Базарбаев, Майлыбай Өтебаев, ақсақал Батырғали Құбашев, Нұрлан Балғынбаевтың жарқын бейнесін, тарих бетінде өшпес із қалдырған еңбегі мен өмірбаяны туралы өте құнды естеліктер айтты.
Ардагер-мұнайшы Халел Салихов өз еңбегінде Нұрлан Балғынбаевтың біліктілік басшылық, қарымды қайраткерлік қырын, ұлт мүддесін қорғаудағы батыл ұстанымын айғақтайтын тарихи құжаттары, биік мінберлерде сөйлеген сөздері, ресми хаттары, баяндамалары, хаттама-анықтамалар, баспасөзде жариялаған мақалалар мен сұхбаттар, оның азаматтық адамгершілік болмысына тәнті замандастарының, ата-анасын көрген көне көздердің естеліктері, арнау-жырлары, сол дәуірді сипаттайтын суреттері өте көркемдік талғаммен, тартымды жариялаған.
Шығарма сайып келгенде бүтін бір тарихи кезең шындығын, халық қызметі жолында аянбай қызмет еткен қазақтың біртуар тұлғасы Нұрлан Балғынбаевтың жарқын бейнесін көркемдейді.
Бойындағы барлық күш-жігерін, білімін, иманын, қарым-қабілетін, соңғы деміне дейін ел игілігіне жұмсаған, халқына қалтқысыз еңбек етуде сан асуларды бағындырған Нұрлан Балғынбаевтың азаматтық іс-әрекеті, адамгершілік қасиеті, ерекше тұлғасы мен биік рухы келешек ұрпаққа үлгі өнеге болып қалатыны сөзсіз.
Меңдеш Салихов ағамыз «Нұрлан Балғынбаев» кітабын тұсаукесерге қатысқан қонақтарға сыйға тартты.
Маусымжан Диханбаева
Маңғыстау облысы