ӨНЕРЛІ БАЛАЛАРҒА АРНАЛҒАН СЫЙ

Өткен аптада Тараз қаласындағы Шерхан Мұртаза атындағы руханият және тарихтану орталығында Сарыкемер ауылындағы Кенен Әзірбаев атындағы балалар саз мектебінің директоры Панабек Ахметовтің “Музыка мектептеріне арналған күйлер жинағы” және “Домбыраға арналған шығармалар жинағы” атты кітаптарының тұсаукесері өтті.

Айтулы шараны облыс әкімдігі білім басқармасының тәрбие және қосымша білім беру ұйымдарының бөлім басшысы Гүлзира Дәрібаева ашып, қос туындының авторы Панабек Үшкемпірұлының ізденісін жоғары бағалап, шығармашылығына табыс тіледі. Байзақ ауданы әкімінің орынбасары Дәуір Дәулетов Балалар жылында жарық көрген кітаптың өнерлі балаларға таптырмайтын музыкалық құрал екендігіне тоқталды. Жамбыл облысы білім басқармасы Байзақ ауданы білім бөлімінің басшысы Нұрболат Мамырбаев, ауданның Құрметті азаматы Қасқырбай Нарбатырлар ретімен сөз алып, лебіздерін білдірді.
Бұдан соң өнер саласының майталмандары Аман Малдыбаев, Мұхтар Рахманқұлов, Дастан Көреген, Ержан Рысметовтер кітаптың лентасын қиған соң, жиын қатысушылары естелікке суретке түсті.

«Ауыл жаңалығы» — ақпарат.