ӨРТТЕН ЗАРДАП ШЕККЕН КӘСІПКЕРЛЕРГЕ САУДА ОРЫНДАРЫ ҰСЫНЫЛУДА

Кеше қала аумағындағы «Ақсай» сауда орталығында өрт оқиғасы орын алды. Тілсіз жаудан зардап шеккен кәсіпкерлерге өз қызметін жалғастыру үшін қаланың өзге сауда орталықтарынан орын ұсыну бойынша тиісті жұмыстар жүргізілуде.
Бүгін Тараз қаласының әкімі Б. Орынбеков көне шаһардағы базар басшыларымен кездесіп, алдын ала келісімге келді. Нақты айтқанда:
1. «Grand Bazаar» басшылығы — 1500 ш.м. құрайтын сауда орнын 3 ай мерзімге (шартқа қол қойылған сәттен бастап) ТЕГІН ұсынуға дайын. Кәсіпкерлер бұл мерзімде тек коммуналдық қызмет үшін төлем төлейтін болады.
Сондай-ақ 3 ай мерзім өткеннен кейін сауда орнын жалға алу құны коммуналдық қызмет шығынын қоса есептегенде, шаршы метр үшін 800 теңгені құрайды.
2. Орталық базардың басшылығы (Асқаров көшесінде) – шамамен 2000 шаршы метрді 5 айға ТЕГІН беруге дайын. Бұл мерзімде кәсіпкерлер тек коммуналдық қызметтер үшін ақы төлейді. Сондай-ақ 5 ай өткеннен кейін жалдау құны шаршы метрі үшін 500 теңге болмақ. Бірақ, коммуналдық қызметтер шығыны жалға алушы кәсіпкер тарапынан бөлек төленеді.