Павлодарда мәдениет және өнер саласының үздіктері марапатталды
Павлодарда мәдениет және өнер қызметкері күніне арналған «Рухани мәдениет – әлемді жаңартудың кілті» атты салтанаты кеш өтті. Шара барысында өңір мәдениетінің дамуына елеулі үлес қосып жүрген азаматтар марапатталып, түрлі номинациялардың жеңімпаздары қызыл кілем үстімен жүріп өтті.
– Сіздердің қызметтеріңіз мәдени құндылықтарды жаңарту, дамыту және дәріптеуге бағытталған, – деді облыс әкімінің орынбасары Мейрам Бегентаев. – Жыл басталғалы бері облыс көлемінде 50 мың адамды қамтыған төрт мың мәдени-көпшілік іс-шара өткізілді. Облыстық театрлар 109 қойылым қойды. Оның астарында сіздердің үлкен еңбектеріңіз жатыр. Сіздерге ерекше алғысымды білдіремін.
Салтанатты марапаттау барысында мәдениет және өнер саласының 50 қызметкері Павлодар облысы әкімі, ҚР мәдениет және спорт министрі, ҚР кәсіподағы атынан Құрмет грамоталарымен, Алғыс хаттармен және «Еңбек даңқы» атты төс белгілерімен марапатталды. Сонымен қатар «Жылдың үздік ақыны», «Жылдың үздік әртісі», «Жылдың үздік композиторы», «Жылдың үздік кітапханашысы» және басқа да номинациялары бойынша жеңімпаздар анықталды.
Облыс рейтингі бойынша Баянауыл ауданы жоғары нәтижелер көрсетіп, жеңімпаз атанды және музыкалық аспаптарды алу үшін сертификатпен марапатталды. Дәл сондай сертификат жуырда ашылған ПМПУ студенттік филармониясына да берілді. Екінші орынды Екібастұз қаласы иеленді, оларға кітапханада коворкинг орталығының ашылуына сертификат берілді. Бас демеуші – «NFC Kazakhstan» компаниясы. Үшінші орын алғаны үшін Ақтоғай ауданы марапатталып, көрініске қажетті киімдерді тіктіру үшін 500 мың теңге сомасындағы сертификатқа ие болды.
– Мен сегіз жыл бойы Ертіс ауданы әдістемелік бөлімінің басшысы қызметін атқарып келемін, – дейді «Жылдың жетекші әдіскері» Назира Баязова. – Біздің еңбегіміздің жоғары бағаланғанына өте қуаныштымын. Бұл одан да жақсы жұмыс істеуге талпыныс береді. Ауданымызда бірнеше рет облыстық және республикалық байқауларда жеңіске жеткен өнерлі жастарымыз көп.
Мерекелік бағдарлама барысында Ресей эстрада жұлдыздары Павлодар облысының мәдениет пен өнер қызметкерлеріне видео-құттықтауларын жолдады. Сонымен қатар театр сахнасында отандық эстрада жұлдыздары Мерует Түсіпбаева мен Ринат Мальцагов өнер көрсетті.
Өз тілшімізден