Павлодарда Назарбаев Зияткерлік мектебінің ұжымы облыс ұстаздарымен тәжірибесімен бөлісті
Химия-биология бағытындағы Назарбаев Зияткерлік мектебінде облыс ұстаздарына арналған «Мектептегі өлкетану жұмысын ұйымдастыру және өткізу» тақырыбында көшпелі тәжірибелік сабақтары өтті. Көптеген жалпы білім беру мектептері бүгінгі таңда Назарбаев Зияткерлік мектептерінің әлеуметтік жобаларын өз мектептерінде де жүзеге асыруда. Оның ішінде «2 апта ауылда», «Ата-ана жұмысындағы 10 күн» және «TEDxNIS» конференциясы, «Wikipedia» жобалары жақсы өріс алып келеді.
Облысымыздың түкпір-түкпірінен келген қонақтарға ең алдымен мектеп өмірімен жақын танысу мақсатында экскурсия ұйымдастырылды. «Оқушылардың зерттеушілік қызметін ұйымдастыру» тақырыбында ұстаздар өз тәжірибелерімен бөлісіп, педагог-ұйымдастырушы-кураторлар оң нәтижесін берген әлеуметтік тәжірибелер туралы түсіндіріп берді. Сонымен қатар, оқушылар арасында «TEDxNIS» конференциясы мен «Wikipedia» жобасы жайлы да сабақтар жүргізілді.
— Бұл семинар арқылы мектеппен жете танысып, әлеуметтік практикаларды басқа да мектептерде сәтті қолдануға болатыны туралы біліп жатырмыз, — дейді Баянауыл ауданының Бірлік ауылындағы Жылбек Ақаділов атындағы мектептің тарих пәні мұғалімі Нұрлыбек Құлқашев. – Өте пайдалы мағлұмат бергені үшін Назарбаев зияткерлік мектебінің ұстаздарына көп рахмет. Мұндай жобаларды жүзеге асыру үшін ешқандай материалдық-техникалық шығын қажет емес екеніне көзіміз жетіп отыр. Осының арқасында оқушылардың еңбекке деген сүйіспеншілігін арттырып, мамандық таңдауға көмек көрсетуге болады. Өзіме қажет біраз ой түйдім. Алдағы уақытта Бірлік орта мектебінде де Назарбаев Зияткерлік мектебінің тәжірибесін қолданатын боламыз.
Еске сала кетейік, Назарбаев зияткерлік мектептерінің жинақтаған әдістемелік қоры, тәжірибесі мен білігі жалпы қазақстандық білім беру мазмұнын жаңартуға негіз ретінде алынған. Елбасы Нұрсұлтан Әбішұлы Назарбаевтың тапсырмасы бойынша Назарбаев зияткерлік мектептерінің тәжірибесін жалпы білім беру жүйесіне тарату жұмысы жүргізілуде.
Әлихан Рахметоллаұлы