Павлодарда жас өнерпаздарды қолдау мақсатында «Жұлдыздар шеруі» шарасы  өтті

Биыл Павлодар «Музыкалық колледж – дарынды балаларға арналған музыкалық мектеп-интернат» кешені оқушыларының жеткен жетістіктері, бағындырған белестері аз емес. Осы оқу ордасында білім алатын жас таланттар 2017-2018 оқу жылында облыстық, республикалық және халықаралық деңгейдегі  29 сайысқа қатысып, 120 бала лауреат атанған.

Павлодар «Музыкалық колледж-дарынды балаларға арналған музыкалық мектеп- интернат» кешенінің ұжымы жыл бойы түрлі сайыстарда бақ сынап, жеңімпаз атанған оқушыларға құрмет көрсету мақсатында «Жұлдыздар шеруі» атты шара ұйымдастырды. Елбасының «Рухани жаңғыру» бағдарламасы аясында өткен шара барысында облысымыздың ғана емес, шет мемлекеттерде Қазақстанның намысын қорғаған жас таланттар қызыл кілем үстімен жүріп, көрермендердің ерекше құрмет-қошеметіне ие болды.

Оқу орнының директоры Серік Сыздықовтың сөзінше, дарынды балаларға арналған музыкалық мектеп-интернатының оқушылары оқу жылының басынан бері 20 халықаралық, 9 республикалық деңгейдегі өнер байқауына барып, қазақ халық аспаптары, орыс халық аспаптары, үрлемелі және ұрмалы аспаптар, ішекті аспаптар, сондай-ақ, зияткерлік білім сайыстарында өнер көрсеткен. Байқаулардың нәтижесінде олар 36 бас жүлде, 65 бірінші орын, 42 екінші орын, 30 үшінші орын әкелген.

— Өткен жылдан бері түрлі сайыстарға қатысып, біздің атымызды шығарған жас талантты музыканттарға осылай құрмет көрсетуді жөн санадық. Мұндай шеру бізде биыл алғаш рет ұйымдастырылды. Бұл шара енді дәстүрге айналады. Өйткені, бұл – жас өнерпаздардың талабын шыңдап, болашақта бұдан да биік белестерді бағындыруына септігін тигізеді. Сонымен қатар, алдағы уақытта зияткерлік сайыстарға қатысушылар санын көбейтіп, білім сапасын көтеруге мән береміз, — дейді Серік Қасымханұлы.

Саяжан НҰҒЫМАНОВА, Дарынды балаларға арналған музыкалық мектеп-интернатының қазақ халық аспаптар бөлімінің оқушысы:

— Биыл наурыз айында Алматы қаласында өткен VI реcпубликалық оқушылар байқауында қыл қобыз аталымы бойынша өнер көрсетіп, бір шығарма және екі күй ойнадым. Байқау қорытындысы бойынша екінші орын иелендім. Болашақта бұдан да үлкен халықаралық байқауларға қатысқым келеді. Осындай жетістікке жетуіме атсалысқан ұстаздарыма және ата-аналарыма алғысым шексіз.

Тілеуберді САХАБА, Павлодар облысы