Павлодарлық Саятбек Оқасов Жазғы Азия ойындарының қола жүлдегері атанды

Павлодарлық спортшы Саятбек Оқасов Азиадада еркін күрестен қола медальге қол жеткізді. Бұл туралы облыстық дене тәрбиесі және спорт басқармасы спорт бөлімінің бас маманы Айбек Ақылжанов мәлім етті.

— 65 келіде сынға түскен Саятбек Оқасов бірінші белдесуінде Палестина палуаны Джуда Мұсаны 11:0 есебімен жеңген болатын, — деді Айбек Ақылжанов. – Екінші белдесуде Оңтүстік Корея балуанын жеңді.

Ширек финалда Саятбек Оқасов Қытай атынан сынға түскен қазақ баласы Ерланбек Кәтеймен кездесті. Белдесудің соңы 9:5 есебімен аяқталып, павлодарлықтың пайдасына шешілді. Қола медаль үшін таласта жерлесіміз тәжікстандық қарсыласын 5:2 есебімен тізе бүктірді.

Еске салайық, 18 тамыз бен 2 қыркүйек аралығында Индонезияның астанасы Джакарта мен Суматра аралының ең ірі қаласы Палембангта XVIII Жазғы Азия ойындары өтеді. Байрақты бәсекеге Азияның 45 елінен ең үздік деген 11 000-ға жуық саңлақ спорттың 42 түрі бойынша сынға түсіп жатыр. Ал Қазақстан құрамасы сапында 440 адам спорттың 37 түрі бойынша ел намысын қорғайды.

Әлихан Рахметоллаұлы