— Мемлекет басшысы Қасым-Жомарт Тоқаевтың тапсырмасына сәйкес халықтың табысын арттыру бойынша шаралар қабылдануда. Осы орайда 2019 жылы қабылданған пилоттық жобаның негізігі мақсаты – жамбылдықтардың тұрмысын жақсартуға негізделгенін атап өткен жөн. Жобаны ары қарай жалғастыру үшін, біз оның бірінші кезеңінің нәтижесін көрсетіп, дәлелдеу керекпіз,-деді аймақ басшысы.

Ауыл шаруашылығы басқармасының басшысы Ербол Жиенқұлов пилоттық жобаны одан әрі жалғастыра отырып, өңірдегі жұмыссыздар санын 73-82 пайызға дейін азайтуға мүмкіндік бар екенін жеткізді.

Оған дәлел ретінде ол пилоттық жобаның бірінші кезеңіндегі нәтижелерге тоқталды.

— 10 ауданнан 11 пилоттық ауылдық округінің 25 елді мекенінде 2478 тұрғындары несиелендіріліп, жалпы 7 856 аула қамтылды. Жеке кәсіпкерлер саны 2282 артса, жұмыссыздар саны 194 адамға кеміді. 589 жаңа жұмыс орындары ашылып, атаулы әлеуметтік көмек алушылар саны 1058 отбасыға немесе 65 пайызға кеміді. Қатысушылардың орташа айлық табысы 44 мың теңгеден 73 мың теңгеге артты,-деді басқарма басшысы.

Сонымен қатар, жоба аясында берілген несиелердің кері қайтарылған қаражаты есебінен жобаны ары қарай жалғастыру мақсатында облыс бойынша 3 ауылдық округтегі 1446 (8 мыңға жуық тұрғын) отбасыны несиелендіру жұмыстары жүргізілуде.

Аталған жобаның екінші кезеңін іске асыру үшін 75,5 млрд. теңге қажет екен.

— Пилоттық жоба ауыл тұрғындарының өмір сүру деңгейін табыс көзімен ғана қамтып қоймай, жалпы өңірдің агроөнеркәсіп кешенін дамытуға да оң нәтиже береді.

Майда шаруашылықтарды біріктіру керек. Сонда, жерді игеру, техника тапшылығы, сапалы тұқым, тыңайтқыштарды пайдалану, өнімді өткеру мәселесін шешуге жол ашылады.

Ауыл маңындағы, үй іргесіндегі жерлерді тиімді пайдалансақ, әр отбасы керекті өніммен  өз-өзін қамти алатын еді. Мұның бәрі жобада  көрсетілген.

Жоба аясында қанша техника сатып алынды, қанша цех, жылыжай салынды? Оның нәтижесінде өнім көлемі қаншаға артты? Міне, осы сұрақтар бойынша нақты талдау жүргізу керек,-деген Б. Сапарбаев жобаның нәтижелі жүзеге асуы тұрақты бақылауда болу керектігін баса айтты.

Өз кезегінде жұмыспен қамтуды үйлестіру және әлеуметтік бағдарламалар басқармасының басшысы Жорабек Баубеков жұмыссыздықпен күрес, халықтың табысын арттыру шаралары туралы баяндады. Ол бүгінгі таңда өңірдегі жұмыссыздардың 25,9 мың адамды құрайтынын айтты.

— Жастардың жұмыспен қамтылуына ерекше назар аударылатын болады. Ағымдағы жылдан бастап NEET санатындағы жастар үшін «Алғашқы жұмыс орны» жобасыныңсубсидиялардың ұзақтығы мен мөлшерін ұлғайта отырып, түлектер үшін «Жастар практикасын» жүргізу, «Ұрпақтар келісімшарты» жобасын жүзеге асыру көзделіп отыр. Осындай іс-шараларға қатысушылардың 70 пайызы тұрақты жұмыстарға орналасады, -дейді басқарма басшысы.

Облыс әкімі әрбір жұмыссыздардың әлеуметтік картасын жасауды тапсырды.

— Жұмысшы топтарын құрып, жан-жақты зерделеу жүргізу керек. Кәсіпорындардызерделеп, олардағы жұмысшылардың жалақыларын талдаңыздар. Жұмысшылардың жалақыларын арттыру жайы назарда болуы тиіс.

Тұрақты жұмыс орындарын құру бойынша шаралар қабылдаңыздар.Жастар өз кәсібін бастаймын десе, барлық жағдай жасалған. Бұл тұрғыда мемлекеттік бағдарламалардың мүмкіндігін тиімді пайдалану қажет.

Еңбек мигранттарына рұқсат беру жүйесін де қайта қарау керек. Олардың орындарын қажет болған жағдайда мемлекеттік қолдау есебінен білім мен дағды бере отырып, қазақстандық қызметкерлермен толтыру керек,-деді аймақ басшысы.

Жиын қорытындысы бойынша әр басқарма басшыларынан атқарылып жатқан жұмыстар бойынша жауаптар алынып, нақты тапсырмалар жүктелді.