ПРЕЗИДЕНТ БЕКІТКЕН МІНДЕТТЕР: ТҮРКІСТАН ОБЛЫСЫНДАҒЫ АУДАН, ҚАЛАЛАРДЫҢ ЖОСПАРЫ ҚАЙТА ҚАРАЛДЫ
Мемлекет басшысы Қасым-Жомарт Тоқаев ауыл шаруашылығын бәсекеге қабілетті озық салаға, агроөнеркәсіп кешенін экономикадағы басты қозғаушы күштің біріне айналдыру үшін ауылға бетбұрыс жасау қажеттігіне ерекше мән беріп келеді. Ауыл шаруашылығы еңбеккерлерінің бірінші форумында Президент атқарылатын жұмыстың негізгі бағыттарын айқындаған болатын.
Бүгін облыс әкімінің орынбасары Нұрбол Тұрашбеков жетекшілік ететін салалары бойынша бірқатар аудан әкімі орынбасарлары мен бөлім басшыларын қабылдап, Мемлекет басшысы бекіткен міндеттердің орындалуын саралады.Отырар ауданында бүгінге дейін көктемгі дала жұмыстарын жүргізу үшін «ЫРЫС» МҚҰ», «РИЦ» ЖШС қаржы алуға 107 өтінім түскен. Оның 67-сі қаржыландырылса, 40 өтінім құжаттары қаралуда. Несие қаржылары дәндік жүгері және бақша дақылдарын өсіруге бағытталмақ. Ауданда 1146 техника көктемгі дала жұмыстарына дайын.
Нұрбол Әбдісаттарұлы су үнемдеу технологиясын ендіру бойынша жұмысты ширатуды тапсырды. Сонымен қатар егілетін дақылдарды озық технологиямен өндіруге күш салу қажеттігін атап өтті. Егістік алқабын ұлғайтып, тұзданған жер көлемін азайту үшін жөндеуді қажет ететін су арналары мен қалпына келтірілетін тоспалар жайы да назардан тыс қалмады.Бекітілген 11 индикатор бойынша Кентау қаласында 7 тапсырмада ілгерілеу бар, 4 тапсырманың көрсеткіштері төмен. Су үнемдеу технологиясын жүзеге асыру бағытында әзірге жоба ұсынылмаған, сондай-ақ, тыңайтқышпен қамтамасыз ету тапсырмасы орындалмай тұр. Кентау қаласы әкімінің орынбасары кемшіліктерді жоюға мерзім сұрап, оң нәтиже көрсетуге уәде берді.
Бәйдібек ауданында 3455 агроқұрылым бар. Көктемгі дала жұмыстарын несиелендіруге 2024 жылы 43 агроқұрылым қатысса, биыл жыл басынан бері несиелендіруге 39 өтінім түскен. Облыс әкімінің орынбасары мемлекеттік бағдарламаларға қатысу мүмкіндіктері туралы ашық ақпараттық алаң қалыптастыру маңыздылығын айтты. Бекітілген жоспарларды жүзеге асыруда салалық басқармалармен тығыз байланыс орнату міндеті ескертілді.Ордабасы ауданының су үнемдеу технологиясын ендіру межесі қайта қаралып, нақтыланды. Аудан әкімінің орынбасарына дайын өнім секторын дамыту мақсатында жаңа кәсіпорындар ашу бойынша жобалар ұсыну тапсырылды.
Кезекті қабылдау барысында Сайрам ауданында құрылатын өндірістік аймақ бойынша жобалар таныстырылды. Аудан әкімінің орынбасары жаңа технология енгізу бағытында жүйелі жұмыстар атқарылып жатқанын жеткізіп, жоспарларын баяндады.
Облыс әкімінің орынбасары Мемлекет басшысы бекіткен тапсырмалардың орындалуы күн тәртібінен түспейтінін ескертіп, басқарма басшыларына бірқатар тапсырмалар жүктеді.
— Кез келген істі бітіретін – ынтымақ. Бағытымыз бір болған соң бірлесіп жұмыс істеу керек. Ауданның көрсеткіші төмендеді ме, зерттеңіздер, анықтаңыздар, бірлесе отырып түзеңіздер. Себебі, бір ауданның көрсеткіші бүкіл облыстың көрсеткішіне ықпал етеді. Өзекті мәселелерді ортада талқылаудан тартынбаңыздар, – деді Нұрбол Тұрашбеков өз сөзінде.Қабылдау нәтижелерімен хаттама түзіліп, тапсырмалар бекітілді.
Түркістан облысы әкімінің баспасөз қызметі