«Қазтест» жүйесі бойынша тестілеу

Павлодар 2019 жылғы 28 қазан мен 1 қараша аралығында С. Торайғыров атындағы Павлодар мемлекеттік университетінде «Қазтест» жүйесі бойынша диагностикалық тестілеу өткізуде. Тестілеуді облыстық мәдениет, тілдерді дамыту және архив ісі басқармасы ҚР Білім және ғылым министрлігінің Ұлттық тестілеу орталығымен бірлесе ұйымдастырды.  

Қазтест жүйесі – азаматтардың мемлекеттік тілді меңгеру деңгейін бағалау жүйесі болып табылады. Қазтест жүйесі халықаралық тілдік білімді бағалаудың TOEFL, IELTS, DALF/DELF, DSH, CELI, TÖMER, ТРКИ және т.б. жүйелерінің қағидаттарына негізделіп жасалған.

Тестілеудің бірінші күнінде 400-дей маман жиналып, сынақ тапсырды. Олардың қатарында облыстық ішкі істер департаментінің, проуротурның, соттың, Ұлттық қауіпсіздік комитетінің және басқа да мемлекеттік мекемелердің өкілдері бар.

— Жүйенің негізгі ерекшелігі қатысушының есту арқылы тыңдаған диалогтар мен монологтарды қаншалықты түсінетіндігін, қазақ тілінің лексикасы мен грамматикасын меңгергендігін және оқу қабілетінің деңгейін қалыптастыруға мүмкіндік береді, — дейді облыстық мәдениет, тілдерді дамыту және архив ісі басқармасы басшысының орынбасары Сәуле Османова.

«Қазтест» жүйесі бойынша тестілеудің бірінші кезеңі диагностикалық тестілеу болса, екінші кезеңі – қазақ тілін меңгеру деңгейлерін бағалауға арналған сертификаттық тестілеу болып табылады. Жалпы аймақта жыл сайын аталмыш тестілеудің екі кезеңі де белсенді түрде ұйымдастырылуда. Биыл осы тестілеумен 2000-ға жуық адамды қамту жоспарлануда.

Осы ретте мемлекеттік тіл саясатының міндеттерін орындау аясында жүргізіліп отырған тестілеу жұмыстары жалғасын табатын болады.

Тілеуберді САХАБА.